Art (Themzia) leh Mizote

Art han tih hian sawifiah dan chi tam tak a awm ang a, themthiamna lam thil a nih avangin talent tih hian a funkhawm ber awm mange tiin ngaihtuahna ka lo hmang ve mai mai a. Thiam thil chi hrang hrang, lemziak, lemtuk, rimawi tum, lam, lemchante nen lam zau taka funkhawmtu chu Art an ti mai a, kan \awngin kan la nei lo. Art han tih hian mi rilrua lo lang hmasa ber chu Lemziak leh Lemtuk hi a ni phawt mai. Lemziak leh Lemtuk hi Art zinga upa ber a ni ti ila kan tisual tam lovang chu.

Pathian hian hnam tin hnenah talent a pe theuh a, Mizote pawhin chu chu kan lo dawng ve a, mitin hnenah erawh a ni lo. Khaw tinah themthiam bik an awm zel a, kan mamawh tawk phuhru tur mi bik hi kan nei \heuh hlawm a ni. Kan khawsak dante, kan ei zawn dantein a la zir loh avangin talent tihpunna lamah kan la hnufum rih em em a ni. Kan rual elna ber lah chu sum leh pai, In \ha, lirthei, TV, Computer leh silhfente an la ni rih a. Chutiang nei thei pa chu mi hlawhtling, mi awhawm, mi zahawm kan tihte an ni a, kan mi ngaihsante an ni.

Khawvel hmasawnain min hrut tel ve zel a, Information Technology pawh kan ramah kan lo hmang ve ta hial a, khawvel rualin ke kan penin khawvel tukverhah kan \halai tam tak chu an lo dak ve thei tawh a, a lawmawm e. Chu hmasawnna ruala hmasawn mawh tak mai chu Art hriatthiamna lam hi a ni. Ei leh bar, Sum leh pai, Material leh IT a hma kan sawn rual hian talent hrang hrang tihhmasawn ve hi khua leh tui ten kan tih makmawh zinga mi a ni tlat mai.

Hnam changkang leh changkang lo tehna pawimawh tak chu an Art hi a ni an ti a. Hmasang mawllai hun (stone age)a mite nunphung chu lung puka an milem ziak leh kerte a\angin mithiam ten an zir a, \hangthar thlengin kan lo hriat ve phah a nih hi. Chutiang bawkin mi hnamzia zir nan an lemziak te, an lem tuk leh kerte hi a \angkaiin a pawimawh em em a ni. Khawvel hnam changkang hmasate hian sulhnu ropui tak tak an lo hnutchhiah a, China hi Art lama sulhnu nei hmasa nia mithiam ten an sawi a ni.

Kan pi leh pute hian sulhnu an hnutchhiah tam lo va, Art lam bikah phei chuan an sulhnu kan hmuh theihte chu lungdawh a an milem kerte hi a ni deuh mai awm e. Thlang tlak hma Seipui leh a chheh vela an khawsak laia Seipui lal Tlatea lung chu hmuh theihin a la awm a, chu lung a\ang chuan Tlatea ropuizia a zir theih a ni. Chutiang bawkin Champhai zawla Mangkhaia pa Mangthawnga lung atang te, Vangchhiaa Laituma lung atang te hian an mimal chanchin a hriat theih a. Zofate chenna hmun tinah chutiang lung kerte chu hmuh tur a la awm nual a ni.

Hnam changkang ten lehkhaa thu leh hla tam tak an lo record tawh lai leh Art ropui tak tak an neih tawh laiin kan pipute  chuan hawrawp pawh an la nei lo va, \awngkain thu an inhlan chhawng a, an thil chhinchhiahna ber chu lung chunga milem ker hi a ni ber mai. An thil chhinchhiah duh chu a lemin an ziak a, an ker a, chanchin an lo record ve \hin. Chutianga lung ker a phun tur chuan ran talha zu leh saa khawtlang hrai a ngai a, a hautak em avangin mi nazawngin an ti thei lo. Lungdawha an milem kerte han en hian mi naran chunglam, lal an nih loh pawhin pasal\ha, sa kap tam, sechhuna khuangchawi pa an ni tlangpui a. An lem kerte chu an sal man zat, an sakah lu lem leh an sechhun zat a ni hlawm a, lem dang pawh an thiltih a zirin an ker bawk \hin. An lem ker dante han en leh ila, mihring lem a nih chuan an lu leh an kein sir zawng a hawi a, an taksa erawh chuan hmalam a hawi thung. Hetianga mihring lem ker leh ziah hi hmasanga Egyptian Art, Persian Art an tihte nen hian a inang hle a, kan pipute khan chutiang chu an lo hmuin an lo zir chhawng ve em niang ti dawn ila an hmuh a rinawm chiah si lo. Pathianin talent a pek ang zelin lemziak leh ker chu kan pipute khan an phak tawk tawkin an lo ti ve \hin. Rawng dum, rawng sen, rawng hring leh engte pawh an lo zawng chhuak ve na a, puan \ial nan leh an ralthuam chei nan bak an hmang lo. Rawnga chei milem ziak leh ker chu an la hmelhriat lo a nih a rin awm.

Vai a lo lian a, Zofate chenna tlangram pawh a chhak a thlangin min rawn luhchilh ve a, a hnu deuhah Kristian Missionary an lo lut leh a, chutah meuh chuan kan pipute sakhua, kan nunphung leh kan hla thlengin mi thlakthlengsak a, sap tihdanah kan lo lungleng ve ta a. Lehkhate min siamsakin zirtirna leh entawn tur thil tamtak min hlui a, chu chuan kawng hrang hrangin hmasawnna lamtluang min zawhtir a ni. Mahse lungdawha milem ker lamah hnuhma thar kan neih loh phah ve thung a, uiawm tak a ni. A chhan chu milem ker aiah hawrawp ziah kan lo thiam ve tak avangin thuin kan lo record ve ta zawk a. Lem ker leh tuk lam pawh chu kan hlamchhiah zui ta emaw tih tur khawpin a buaipui kan awm ta meuh lo hi a pawi hle a ni. Lemziak leh tuk lamah hian hnam changkang zawkte aiin kum za tamtakin hnufual mah ila, Mizote hi talent nei \ha tak kan ni a, mi thil tihdan man zung zung chi kan nih avangin hma pawh kan sawn chak ve hle mai.

Zirna nei hauh lovin talent nei kan mi hmasa ten lem an lo ziak a, mi hriat hlawh tak tak pawh an awm nual a, a \hente phei chuan mual min liamsan tawh nghe nghe a ni. 1960 hnu lam deuh a\ang phei chuan ei zawn nan a hmanga dawr  hawng pawh Aizawlah an awm ve tawh a. 1974-ah Lemziak pawl hmasa ber Mizoram Painters’ Association chu Aizawlah din a lo ni a, lemziak mi tlem tein bul an lo \an a ni. Tunah chuan Artist tia inchhal ngam engemawzat an lo awm ve tawh a, Art form chi hrang hrang tuipuiin an practice ve mek a ni. Art Exhibition (Themzia Enpui) pawh vawi duai lo kan nei tawh bawk a, khawvel rualin ke kan pen \an ve ta chu a nih hi.  Zirna lamah pawh Diploma in Fine Art, Bachelor of Fine Art, Bachelor of Graphic Art, Bachelor of Sculpture, Bachelor of Applied Art, Master of Fine Art te kan nei tawh a, Ph.D (Fine Art) bei mek pawh kan nei a ni.

National level Art workshop leh Exhibition-ah Mizo lemziak mi an tel ve ta fo a, India hmun hrang hranga programme hrang hrangah te sawm an lo ni ve ta fo mai. Chutiang programme-a telte chu zah takin an lo dawngsawng a, nuamsa takin an lo enkawl \hin. An rama hmun nuam leh ennawmte an enpui a, entertainment chi hrang hrangin an lo awi bawk \hin. Artist te danglamna pakhat chu inhmu ngai reng reng lote hi Artist an nih an inhriat chuan an innelin an inngaina nghal em em zel hi a ni. Chuvangin Art a\ang hian hnam inpumkhatna lama hmalak pawh a remchang hlein a rinawm.

Art hian mihring rilru puitlinna (maturity)ah a hruai lut a, remhriatna a neihtir a,  suangtuahna thui takah mi a thlen thei a ni. A taka hmuh mai theih tawh loh kan hnam nunphung leh kan hnamzia te chu Art a\angin a vawn nun theih a, khawvel mite hmuhah a pho chhuah theih bawk a. Hnam dangin kan hnam nunphung awlsam taka an hmuh a, an zir theihna a ni bawk. Chuvangin kan mithiamte kutchhuak hi kan hnam rohlute an ni a, kan ramah tam tak kan hum loh chuan ram pawnah a luangliam zel si a, sumpai ngahin kan building te khir iaih uaih mahse chhungril kawrawng tak angin mi ten min hmu dawn a ni. France ramin khualzin mite an hipna ber chu an Art collection ropui tak hi a ni tel tlat mai. Paris hi khawvela Art city tih hial khawpa Art museum leh Gallery tamna a ni a, Paris thleng tawh chuan Lourve Museum a Monalisa painting hmuh an duh vek a an en ngei \hin. Khawvel Artist ropuite kutchhuak tamna ber France ram chuan sorkarin budget siamin painting a lei \hin tih hi Paris-a lemziak zir tawh mi pakhat lehkhabuah a chuang a ni. Ram changkangin Art an ngaihsanna chhan chu mitin deuhthaw hian Art knowlege an neih vang a ni. Talent neite sulhnu hi an hnam hausaknaah an chhiar a, chumi tihpun dan chu an ngaihtuah \hin.

Art hi them thiamna leh suang tuahnaa tihpuitlin chi a ni a, Art chi hrang hrang chhungah Painting pawh chi tam takin an then a, a zau em em a ni. Eng ang painting pawh nise painting tha chuan mawi dan an nei \heuh a, chumi en thiamna nei chu kan ramah an la tlem em avangin Art kan hlut dan pawh hi a la hniam hle a ni. Painting kan en duh dan pawh hi ‘ang’, ‘mawi’, ‘nalh’ tih lam a la ni a, a lawmawm e. Mahse chumi piah lamah chuan a painting azirin chhuizui tur tam tak a awm \hin. Art ngainatu an tam loh chuan hmasawnna kawnga pen zel hi a harsa a ni. Mi tinin Art knowlege kan neih theih nan thil tih tur  kan la ngah hle chu a nih hi. Art zirna School emaw College emaw kan la nei lo pawh hi a rualawh thlak hle a, kan thenawm state Assam, Tripura leh Manipurte chuan Fine Art College an neihna hi Kum 50 lai a tling tawh a ni. Kolkata Artist senior tak pakhat chuan ‘Phai lamah rawn inpho chhuak ve rawh u, in ramah chuan mi sangkhatah mi pahnih velin painting lei an duh mai thei a, chu pawh chu a tling lo mai thei. Phaiah chuan mi sangkhatah mi sawmhnihin painting lei an duh a ni,’ tiin duhsak takin min rawn a, chu chuan kan dinhmun chu a sawi fiah khawpin ka hria.

1990 kumah Guwahatti Artists’ Society buatsaihin Judge Field-ah Kala Mela ‘90 tiin kar khat awh Art Exhibition ropui tak an buatsaih a, North East Artist-te puala buatsaih a ni. Mizoram a\angin  lemziak mi 9 kan kal a, painting pawh \hahnem ve tak kan keng a, stall-2  kan luah ve a. Chu Kala Mela ‘90 kharna inkhawm \an hmaa thil thleng chu ka rilruah a la cham reng mai. A kharna inkhawm chu zan dar 6:00 ah \an tur a ni a, tlai lam ni a tla dawn tawh a. Chutih lai chuan khuallian tur Assam Chief Minister Prafulla Kumar Mohanta chu a lo thleng a, pavillion te a fangkual a, mi pahnih thum bakah Guard ten an rawn zui a. Chumi hnu lawkah chuan light eng tak a chhunin camera flash de sup sup nen mi tam tak rawn inzui hum hum kan hmu a,  tu tak niang maw tiin kan lo thlir thup mai a. Chu pa chuan pavillion chu a rawn fang kual ve bawk a. Amah chu Kala mela ‘90 kharna inkhawma khual zahawm tur chauh ni mahse, khuallian aia heti taka mipuiin an zui hum hum mai chu mak kan ti hle a ni. Chu pa chu; Assamese poet, zaithiam leh hlaphuah thiam, November 2011-a chatuan ram pan ta Bhuphen Hazarika a lo ni reng mai. Kum 20 chuang kal ta a chu thil thlengin min hriat chhuah tir chu, ‘Mite hian ngaihsan tur dik tak an lo hria a ni…’ tih hi a ni.

(ART hi Mizo tawngin “Themzia” tiin ka han vuah chhin a, EXHIBITION pawh hi “Enpui” tiin ka dah bawk a. Buta)

(Pu Lalbuta hi Zofate Art lamah chauh ni lo rimawi khawvela hmasawnna thlentu leh ti ropui tute zinga mi a ni a, hetiang mi kan memberte zingah kan nei hi a lawm awm hle. Ed)

Leave a Reply