Ha Enkawl Dan

A hmasain duhsak taka Souvenir buaipuituten Article ziak tura kei tehlul min rawn sawm avangin ka lawm hle a. Kan khawtlang hmasawnna tura VIP te hmalakna a ropuiin, ka chhuang hle a ni. He an hmalakna lawmawm tak hian chhiartu zawng zawwngte tan tangkaina a neih ngei pawh ka ring tlat a ni.

VIP Silver Jubilee Souvenir Editorial Board atangin ka zirna (profession) lam ziak turin min ngen a. A vaia ziah sen a nih loh avangin ziah tur leh ziah loh tur chinah ka buai hle a, chhiartuten an tangkaipui theih dan tur ni a ngaiin hetiang hian ka ziak ta a ni.

Mihring ha hi chi hnih Hahlam (Decidous) leh Hatak (permanent) te an ni. Kan pian chuah a\anga thla ruk kan nih hian Hahlam a \o \an a, pianhlima ha nei pawh a awm theih a ni. Tichuan kum hnih kan tlin hian Hahlam a \o kim a. A vaiin Hahlam hi sawmhnih, khabe chung lam (maxilla) ah sawm, leh hnuai lam (mandible) ah sawm ve ve in kan nei a. Tichuan kan Hahlam te chu kum 6 kan tlin a\anga bal \an tur a ni. ( hei aia hma hreta bal pawh a awm) Tichuan kum 13 kan tlin chuan Hahlam te hi bal kim vek tura ngaih a ni. Amaherawhchu, kan sawi ang diak diak lova awm pawh a awm a, ngaih\hat lohna tur a ni chuang lo. Tichuan kan Ha a bal \an (kum 6) a\ang khan Hahmai a lo \o \an ve leh chiah a, kum 16 kan tlin meuh chuan Hapui pathumna (Habawih / 3rd molar) tih loh hatak (permanent teeth) chu a \o kim vek tur a ni a; Kum 18-25 inkarah Habawih te hi \o tura ngaih a ni a. Tichuan Hatak hi avaiin 32 nei tur kan ni. Tin, Ha inpawlhsawp hun lai (mixed dentition period) an tih kum 6 -13 inkarah hian Ha ngaihsak uluk a ngai hle a ni.

Naupang Ha a \o kim tawh chuan nu leh paten uluk taka enkawlpui tur a ni. Thianghlim leh fai taka Ha nawhpui \hin a \ha. Tin, thil thlum chocolate, kurtai, chini etc a tlem thei ang ber ei tir leh an ei a nih pawhin uluk taka ha tih fai tir leh \hin a pawimawh hle. Kum 2 an tlin a\anga hetianga nu leh paten kan enkawl pui chuan a nget nasat avanga Ha na leh a hun lova phawi (extract) a pum pelh theih a, hei hian an puitlin thenga an Ha  awm dan tur a hril hle a ni. Tin, ka a\anga thawk, zungpui fawh, tin seh, lei hawl, Pencil leh pen seh etc. te an ching a nih chuan an Ha nasa takin a \halo lamin a nghawng thei tih hriat a sim tir vat a \ha. A \ul chuan Doctor panpui vat a finthlak. Hahmai chunglam aia hnuialam a poh chuan a rang thei ang bera Doctor pan vat a \ha ber.

Mizote hi taksa vawn thianghlimna lamah kan la hniam deuh a. A bikin Ha leh Kachhung phei chu kan ngaihthah leh zual emaw tihtur a ni. A theih hram chuan thla thum danah tal Ha check up \hin a \ha hle.

Ha nget \antir hi a dum a, a tir te a\anga hnawh vat chuan harsatna dang thleng miah lovina awm thei a. Hnawh hunlaia hnawh vat loh chuan Ha hnawh pangngai a hnawh a theih \hin lova, ha la \ha si a nih chuan a thling paih (root canal treatment) tih a ngai \hin. Ha nget nat avanga phawi tawp ai chuan a thling paih hnua hnawh hian ha rei tak a la hman theih a a \ha hle. Tin, phawi a nih tawh chuan ha lem siam leh te a ngai a, a vuahtu tan thil ninawm leh buaithlak tak a ni thei.Mi tam takina kan harsatna heng Ha ziau, Hahni puar (epulis), hnai (abscess) Durh (pus) te hi a nget leh thil dang (trauma) vang a ni duh viau mai a, Doctor thiam rawn vat a finthlak ber.

Meizial zuk, kuhva, tuibur, sahdah leh gutkha lam chi ti nasa mite zingah ha nget si lova na, nghing,

ziau, hit leh harsatna chi hrang hrang a tam bik. Tin, heng tih nasat avang hian cancer hial a thleng thei tih hriat tur ani

Ha hnawh hnua na leh kan tih ang chite hi a nget dang insiam vang leh a hnawh dan fuh tawk lo vangte a ni duh hle a, inentir vat a \ha.

Tam takin kahhitna (Local Anaesthasia) injection hi kan hlau a, na tuara phawi ai chuan second reilote injection na tawrha, na hre miah lova phawi a fintlak hle. Tin, Hahlam leh nghing nasa bik tan Topical Spray hmangin na hre miah lova phawi theih a ni bawk.

Tin, Zunthum (Diabetis) thisensang (Hypertension) Thawhah (Asthma) leh lung tha lo leh enkawl ngai bik (medically Compromised Patients) ten ha an entir/phawitir dawnin Doctor hriattir ngei ngei a tha. Heng case te hi fimkhur ngai bik case an ni a, LA dose, dawmdawi chawh leh enkawlna a dang bik a ni tih hriat bawk a pawimawh hle.

Ha kuh, poh leh to ruallo te hian ha a tinget sam bik a, siam\hat theih a ni. Amaherawhchu, Ha pawh ngil kan tih te hi kum 20 tlin hmaa tihin a awlsam bik a. A tir tea tih vat chuan lakthlak theih chi hmang pawha siamthat theih a ni. Lakthlak theih loh ‘fixed’ kan tih ang chi hi a siam\hat hun chhung a duh rei avangin rei tak vuah a ngai a, a theih chuan kum 20 tlin hmaa vuah ngei nise a \ha bik.

Heng thei rah \henkhat Apple, Kawlthei leh sunhlu te hian Ruh, Ha leh taksa peng dangte pawhin an mamawh thil \ha tak an pai avangin nuin nau a pai \an a\angin a tam thei ang ber ei a \ha hle. Naupan lai a\ang a ei tam chuan ha mai bakah ruh leh taksa a harsatna dang a tlem bik niin mithiamte chuan an sawi bawk.

Thawrimchhia kan tih tam ber hi ka leh ha fai tawk loh vang a ni duh hle. Pumpui leh ril lawng (ulcer) vangin a awm thei bawk. Hahni thi kan tih tam tak pawh hi Ha leh Hahni inkara bawlhlawh \angin a insiam thei a. Chuvangin Ha fai taka enkawl (scaling)\hin a \ul hle.

Mi tam takin kan buaipui em em hapui hnuai lam tawp ber na \hin hi hahniin a khuh (operculitis) vang emaw, khabe ruh alen tawk loh vanga Ha-in \ona tur hmun amamawh zat a neih loh (Impaction) vangin emaw, bawlhhlawh tang (Pericoronitis) vang emaw a na a ni \hin a. A case a zirin Impaction phawi a ngai a, Operculitis a nih chuan Hahni paih a ngai a, Pericoronitis a nih chuan tihfai (scaling) a ngai \hin.

Ha kan nawh reng rengin uluk taka nawh tur a ni a, a theih phei chuan darthlalang hmaa nawh ni nghe nghe se duhthusam a ni. Tichuan Toothbrush kha 45o a dahin a bial (circular motion) zawnga nawh emaw a khuih a khuih hiau hiau mai tur a ni. Toothbrush khawng tak hman loh hi a \ha ber a, natak taka nawh loh a \ha, ha filh a hlauhawm.

Tin, Ha nawh lai hian uluk thei ang bera nawha minute 2 vel tal hun hman a \ha. Kan hriatreng atana \ha chu puitling leh naupang toothpaste hi a hran ve ve a awm a, Naupangte chu an tan bika siam ngei toothpaste hman tir a \ha bawk.

Ha leh a vel hmawlhtea hawlh chin hi a \ha lo hle. Mi tam takin ha kara bawlhlawh leh thil dang tang tihfaina atan  hmawlh an hmang \hin hian ha a ti awng a, hahni a tifilh bawk a, hnawh phui leh a harsa em em bawk a ni. Chuvangin ha kara bawlhhlawh leh thil dang tang tihfai nan a bika siam (Dental flossing) la hmanga siam hman a him ber a ni. Hrisel tak leh thianghlim taka i awm theih nan i ha uluk takin enkawl ang che.

Leave a Reply