Hnathawh leh Inrenchem

Hnathawh leh inrenchem hi Sawrkar leh mipui tan thupui pawimawh tak, zirho tham leh nunpui nghal \ul tak a ni. A \angkai zawnga kan zir chhuah theih chuan mi mal, chhungkua leh sawrkar tan hlawk tak tur niin ka hria. Tunlaiin kan ramah : Aizawlah leh khaw hrang hrangah hnathawh nachang hre lo nge , an peih loh hrim hrim vang zawk; hnathawk lova awm mai mai an tam ta. Pocket money erawhchu nitin chhungte hnen a\angin an dil chhuak ve ziah a. Veng tinah hian mual eng lawma \halai \hu khawm talh talh, au thler duai duai, leh mi kawng kal thlir zak tum ni awm tak engemaw zat chu hmuh tur an awm deuh zel mai. Chhungkaw \henkhatin mahni inah emaw, luah man chawiin emaw Dawr an kai a. An bula tap ve chawt, hnathawh nachang hre lo leh tum lo te pawh an awm ni mai hian a hriat theih. Heng hi enge a chhan ni ang? Chhungkaw inenkawlna hlawhchham vang nge? Zirnaa kan hlawhchham vang? Nge sorkar hlawhchham vang zawk? Hmasawnna rahbi dik tak kan rah theih nan kan ngaihtuahna leh rilru put hmang tidanglamin, kawng thar zawh chu a ngai ta a nih hi.

Hnathawk: Hnathawk tih hian Mizo pa rilrua awmzia a neih dan chuan Hnathawh thawmhnaw inbela ram lama hnathawh hi a ni ngei ang. Thingtlang pa-in “Kut hnathawk mi ka ni a,” a tih pawhin he rilru pu chunga sawi \hin hi an ni. Nimahsela, hmasawnna kawng hrang hrang avangin ram lamah chauh hna kan thawk ta lova. Khawchhungah hna chi hrang tam tak: in sak, lungrem,lei laih, lu meh, dawr nghah, lehkhabu ziah, etc thawh tur a lo tam ta .

Heng thawktute zawng zawng hi hnathawktu an ni vek. Hnathawk tih chu hetiang hian i han hrilh fiah dawn teh ang : “Hnathawk tih chu taksa emaw ngaihtuahna emaw hmanga thil tangkai ti tura mahni inhman hi a ni.” Chutiang a nih chuan ram lama hnathawh te, in-a hnathawh te, puanthui, lehkha ziah, etc te chu Hnathawk tih chuan a huam vek ta a nih chu.

Chi |ha tuh: Mizoramah mai ni lovin Khawvel pumah hian thil tha leh lawmawm thlen thei tu chu \halaite hi an ni a. Chutiang bawkin chhiatna leh sualna thlen theitu chu \halaite bawk an ni. Chuti khawpa pawimawh chu an nih si avangin inzirtirna dik, tlo leh \ha pek chu Nu leh Pa, Kohhran leh Sawrkar mawhphurhna a ni. Kan chhehvel ram hrang hrangin |halai an huam tir dan i han thlir teh ang.

Hetiangin:

Bangladesh                    Kum 15-30

Brunei                  Kum 15-35

India                     Kum 15-35

Hongkong            Kum 10-24

Malaysia              Kum 15-30

Pakistan               Kum 18-30

Singapore             Kum 15-30

Sri Lanka             Kum 15-29

India rama cheng ni mah ila, Mizoramah chuan K.|.P. te’na an hman mek lai kum 14 – 40-in a huam chinte hi \halaite ti-a kan hriat lar ber a ni mai awm e.

Awmpui nei lovin , chhung tin hian kan fate hi an tet lai a\angin inchhung khawsak zirtir uar ila, an len hnu pawhin an thlah lovang. Awmpui neih \hanna chhungkua-ah chuan an kut ringa innghah a awl.

Chu chuan naupang thanglian tur nun chu a hruai sual a, mi TLAW-ah an chhuak fo. Hnathawh hi chhungkua a\anga inzirtir ngei ngei tur a ni. Fate hnathawh tir ngai lo chuan a fate a hmangaih lo a ni. Kan |halaite kaihhruaina lamah kan tihfuh hlauh chuan kan ram naktuk dinhmun chu zing ni chhuak engmawi tak ang a ni anga. Kan tihsual vaih erawh chuan tlai ni tlak hnua thimna-in ro a rel ang hi a ni thung ang. Chuvangin kan \halaite nunah hian rah duhawm tak chhuah thei tur chi \ha kan tuh a ngai tak meuh a ni.

Thawh hreh zawng neih loh: Abikin khawpuiah hian a mi mir hian thlan tla khawpa hna hahthlak thawh hi kan peih ta mang lo emaw ni. Pawl hming emaw, a huho emaw-a thawh hreh nei lo ni awm tak hi, mahni pualin, a hlawkna pawh mahni tel ngei tur pawh ni se, thawh hreh zawng kan nei tlat fo. Mi rilru puitling chuan thawh hreh leh zah a nei ngai lo. Hnathawk lova awm hi a zahthlak zawk tih hriatchian a va tul em!

Ni 24 – 27. 02. 1994 K.T.P General Conference, Govt. High School Field, Aizawl-a nghah chu United Kingdom-a Interserve-a thawk mi 6-in an rawn chhim ve a. Chung mi-te chu Questionnaire siamin zawhna tam tak lo chhantir an ni a. Zawhna chi hrang hrang zinga pakhat “An lo kal nana pawisa an intuak dan” zawhna chu hetiang hian an chhang

  1. William Hunter Smart : Waiter ah \angin, puante su-in leh Huan siamin thla thum chhung ka inhlawhfa.
  2. Andrew : Thla thum chhung Decorator (cheimawitu) hna thawkin leh thla khat chhung restaurant-ah waiter hna thawkin ka inhlawhfa.
  3. Geoffrey White : Ka theih ang angin ka khawlkhawm.
  4. Andrew Edgell Stacey : Kristian Coffee dawr ah thla nga chhung ka inhlawhfa.
  5. Donthen Anne Clements : Damdawi Inah Nursing Assistant hnathawkin ka inhlawhfa.
  6. Sarah Keron : Auxiliary Nurse hnathawkin ka inhlawhfa.

Sap kan ti a, kan ngaisang viau va. Zah pawh kan zah bawk. Mahse a tul dan azir zelin eng hna mah an thawk hreh lo tih a lang. An incheina leh an khawsak nuam ringawt thlir lovin, inhlawhfain eng hna pawh an thawk mai a ni tih i zir tel ngei teh ang u.

Tlangval pakhat chu Aizawl Motor Kawngpui sir lun lai takah pheikhawk chhe siamin nitin a thu \hin a. He Kawng hi pa pakhat chuan nitin a paltlang ve ziah bawk a. Pheikhawk chhe siamtu chuan he pa hi “Ka pu chibai”, tiin zahna a lo lantir \hin a. Engemaw hnu-ah chuan he pa hian pheikhawk chhe siamtu chu tunge a nih a zawt ta chawih a. Ani chuan a college-a B.A zirlai a nih thu a hrilh a. Chu Principal chuan a ngaisang ta hle mai a. Zirlai zingah chuan entawntlak a nih zia thu a sawi chhuak ta hial a ni. He pheikhawk chhe siam tu hian B.A a passed hnu reilote-ah sawkar hna pawh a hmu ta nghe nghe a. Bul tanna tlawm leh hmuhsitawm hian Buhchangrum leh faisa a fun tel \hin a ni.

Pialral nun chen, chhiatna: Hmanlai kan Mizo Pi leh Pu-te chuan hna an thawk nasa. Chuvang chuan hnathawk lova a tui \ha \ha ei-a, in an chak em em a. Chu nun chu Pialral-ah chen thei dawnin an inngai \hin a ni. Kan Pi leh Pu tena an sawi Pialral chu keini ho hian kan chen ta a ni ber mai. Thingtuah lak a ngai lo. Kan hmet zeuhva mei a lo chhuak ta. Tui chawi a ngai lo. Choka, ek in leh bual in thlengin kan duh huna herh haw mai theihin tui a tling liau luau mai. Buhfai lah chu  duh huna lei tur a awm reng. Kan van nuamsa em! Hei baka Pialral nun chen hi a awm chuang dawn em ni?

Mahsela, kan nawmsakna te hi chhiatna bul a lo ni ta. Zunthlum leh B.P. sang natna te hi Mizo zingah a va hluar ta em! Nitina thlansa khawpa hnathawk leh kal vel \hin te hi rethei leh eichhe zawk ni mahsela, a hrisel zawkah an \ang ta. Thlansa khawpa hna kan thawh peih loh chuan Hausa-te an retheih zawkna leh retheite an hrisel zawkna ram nih kan hlat lo vang. Australia a\anga hmar chhak lamah khuan ram te reuh te, hausa zet mai a awm a. Kum 1968 khan mahnia ro inrel (independent)-in a awm \an a. Chu ram (thliarkar) hming chu Nauru a ni. Chhungtin mai chuan a tlem berah motor 2 tal chu an nei vek a tih theih. Thlan tlaa hnathawh a ngai lo. Chenna In, Electric, tui, telephone, damdawia inenkawlna te chu a thlawnin Sawrkar a\angin an hmu a. An ram leilung hausakna an chen a ni ber. A tui \ha \ha an ei a. Mi 10 zelah 9 chu ‘thau tak’ an ni zel a. Thalai te chuan kg 135 te an buk pel zawk zawk mai a ni. Lungna leh zunthlum an vei nasa hle. He ram President Kinza Clodumar chuan : “Hmana sava leh thingkung mawi tak tak awm thinna chu tunah chuan thlan In mawi dinna hmun a lo ni ta” tiin a sawi.

Hnathawk lova duh duh ei leh in theih hi kan duhthusam a la ni cheu zel dawn em?

Thatchhiat a thiang lo: Mizorama cheng Mizo zawng zawng hi Kristian kan ni vek a tih ngamin ka ring. Kristian chu a thatchhe thiang lo. Khawvelah hian Calvina zirtirna zuitu te chu Kristian ram rau rauvah pawh an dingchhuakin, an hausa bik an ti thin. Mizoram Presbyterian kohhran hi Calvina zirtirna pawmtute zing ami kan ni. Enge kan an ve dawn le? Mitin kan hnathawhah kan rinawm tur a ni. Thawh  theihna leh thawhna hun \ha kan neih chu kan thatchhiat bosan tur a ni lo. “Mahni kut ngei hmangin hnathawk rawh u; tichuan miten an ngaisang ang che u a, engmah thlakchham in nei lovang.” ( I Thes. 4:11& 12)  Mi thawhchhuahsa ringa nun ve ringawt mai hi a zahthlak . Paula chuan: Tu kut ata mah a thlawnin chhang kan ei ngai hek lo, in zingah tumah kan tih hautak lohna tur che u-in a chhun a zana hah tak leh rim taka thawk chungin kan ei zawk a ni………Tupawhin hna a thawh duh loh chuan ei pawh ei suh se a ti tawl mai a ni. Kret thliarkar ami te angin ‘Thatchhe chaw heh’ i ni lo hram ang u. Kan mi te chu tlakchham an neih ngai loh nan hna \angkai thawka inhmang reng turin fuih la, an awm mai mai tur a ni lo, tiin Paula chuan Tita chu a chah a ni. Awmawl ngawt ai chuan hlawhchhuah nei kher lo pawha hnathawh chu a tha zawk reng reng.

Hnathawh chungchangah Suzukia chuan hetiang hian thu pawimawh tak a sawi: Hnathawktu (Worker)-in nikhatah darkar 8 a thawh chuan, Supervisor chuan darkar 10 a thawk tur a ni. Manager chuan darkar 12 a thawk anga, Company President chuan englai pawhin

a thawk reng tur a ni, tiin.

Hlawhtling tura mi hnathawh dan han hriat chuan hlawhtling khawpin hna kan thawk lo tih a lang \hin. Mi hlawhtling te hian mi aiin hun an nei tam bik chuang lo.

Japan ram khati khawpa khawvel hriata tlu sawp tawh kha, khiti khawp khian a ding chhuak leh thei. Engvang nge? Chhan hrang hrang a awm ngei ang. An taihmakna leh thawhrimna chu a bulpui berte zing ami a ni ngei tur a ni. Japan ho chuan: Sap hovin “Week End” an hmang a, an hlim \hin. Keini chuan WEEK END hman aiin 24 hrs  hnathawh kan hlimpui zawk, an ti. Tunah chuan Japan ram dinhmun chu sawi vak a ngai tawh awm lo ve.

Hnam thatchhia nge hnam taima? : Tuna Mizoram dinhmun thlirin hnam taima nge kan ni-a i hriat, hnam thatchhia? Hnam pum anga kan dinhmun thlir thiam a har i tih pawhin, chhuanlam dang siam miah lovin, rilru thianghlim tak pu-in, nangmah inbih chungin he zawhna hi han chhang dawn teh : Taima i inti nge, thatchhia i inti ? Hnam hi a hranin a awm lova, mipui hi a hranin an awm chuang lo. Mi mal te te infinkhawm hi hnam kan ni a, mipui kan ni mai. Mizo hi hnam taima nge kan nih, hnam thatchhia? tiin mi ka zawt \hin a. Thatchhia ti leh taima ti an awm ve ve a. ‘Taima’ titu te hian hnam thatchhia anga insawi chu an ui deuh mai a ang zawk mah emaw chu ka ti deuh. Reverend pakhat ka zawh chuan hnam taima kan ni-a a hriat thu a sawi a. Hetiang hian zawhna ka siam zui a: A nih leh Vai Mistiri leh an Helper te hi; Mizo aia hlawh tlem zawk chungin hna an duhthawh hle si a? |henkhat : Thirchhhia, saidawium, lehkhachhia, etc lei tur zawngin veng tinah an kal peih a. A nih loh leh chhang, artui, etc kawtin an zuar peih reng mai bawk a. A \henin lu an met a, an mu\ia bawk a. An tih thikin eng eng emaw chu kan han ti ve a, mahse peih rei a har leh fu si, ka ti a. Dik a tih vang ni maw, min thlawp zawng chuan a sawi ve zawk ta mah a.

Inrenchem : Mizo te hi kan thilphal vang nge, kan mawl vang nge, kan pawk vang zawk, Nge, kan chapo vang? Kan pawisa neih ang ang te hi hman pawp pawp kan ching. Nei lo chung pawhin nei anga lan kan tum. A chuang a liam ni lova, a \ul dan ang zela hman hi inrenchemna zia a ni. Chutih rualin a \ul leh mamawhah pawha hman phal loh hi ‘kawm’ nihna a ni thung. A \ul huna, mahni tan pawha hmang phal lohtu aia mi kawm an awm chuang lo. Kawm hi a zahthlak a, inren erawh a tangkai.

Retheihna leh phur rit: Pawisa hman dan kan thiam lo leh inren nachang kan hre lo hi Mizo zinga sual lian tak hringtu a tling. Awlsam taka sum hmuh chu awlsam takin a chhuak leh \hin. Nei hlei lo, inren nachang hre chuanglo nun zia hi khawi a\anga kan rochun nge ni ang? Inren nachang hre lo chu mi mal a ni emaw, sawkar a ni emaw, a lo retheia, phurrit takin a delh \hin. Mizoram sawrkara Finance Minister- in july ni 15, 1997-a Mizoram sawkar pawisa bat Rs.117.14 crore a nih thu leh Reserve Bank of India-in ngunhnama a nghawnga tin reng ang a nih thu a sawi te, ramin harsatna a tawh mek chu thildang vang ni lovin phakbak aia sanga kan lo khawsak rei lutuk tawh vang a nih thu te , Sawrkar dinhmun chu damlo anga chanin, damdawia enkawl dam mai theih ni tawh lo, zaipui (operation) ngai dinhmuna ding a nih zia te, zai hma poh leh a na a nep zawk tur thu a sawi te kha hriatreng tlak leh chhinchhiah ngei chi a ni.

Tun Sawrkara Finance Minister-in kum 2011-a he hna a chan hnu reilo te-a a sawi chu : Tun ang zela Mizoram hi a kal a nih chuan tun a\anga kum nga (5) hnu-ah chuan Mizoram sum dinhmun chu a chhe hle tawh ang, tih hi a ni. July 2011 chhunga Budget Session neih laia MLA pakhat zawhna a chhanna-ah Finance Minister chuan kum 2010 – 11 thlenga Mizoram Sawrkar leiba chu Rs vaibelchhe 3401.21 a nih thu a tarlang. Vaibelchhe 3000 hi ngaihthah hmiah ila, a la bang Rs Vaibelchhe 401.21 ringawt pawh hi Kum 1997-a sum bat Rs vaibelchhe 117.14, chutih laia Fin. Minister lungkham em em aiin a la tam fe zawk. Thaw-ipik thlak i ti ve lo maw ?

Nauru thliarkar chungchang kha han sawi leh ta ila. A hun laia Khawvel ram hausa berte zinga chhiar ni pha hial \hin kha, tunah chuan an hausakna chu an chen ral tan ta. Intodelh \hin kha ba neiin an awm ta. 1991-1996 chhunga an bat belhkhawm chu $250 million a tling. Chumai a ni lo. Ba \un chungin puk belh zel a ngai ta bawk. Inrenchem nachang hriat loh chuan sawrkar hial pawh a tla chhe thei a, retheihna leh phurritin a delh bet thei a ni tih a chiang.

Inren i zir ang u: Khawvelah hian India ram hi ram rethei ber te zinga ami a ni a. Mizoram hi India rama State rethei ber te zing ami kan ni leh a. Chhuan tur leh chapo pui tur kan nei lo. Sawrkar chuan hmasawn nan theihtawpin tan a la reng ang. Kan khawsak a lo ziaawm zawk theih nan mi mal leh chhung tinin hengah te hian inren in zir teh ang u:

EI LEH BAR: Chhungtina eirawngbawltu ten chhungkaw khamkhawp hriatchian a pawimawh. Mizo nun zia-ah eibang awm lo chu, kham lo angah kan inngai \hin. He rilru hi basan a \ha. Chaw \hing, chawhmeh \hing, etc neih fo reng mai hi a changkang lo. Vawk vulh tih vanga bangnawi neih fo pawisak lohna hian sum a eiral. Engkim a thar zela ei hi a hrisel zawk Ruai\heh nikhua-ah pawh inzir kan mamawh ta hle.

SILHFEN: Rethei tak si hi, kan han inchei hi chuan kan nalh ve fu zel mai a. Hmelin a zir phei chuan mi lian chhungkua a\anga lo zi chhuak ni awm tak hi kan ni. Puipun nikhua-ah pawh kan mi hriatsa an nih ngawt loh chuan rethei leh hausa hriathran hleihtheih loh khawpin kan nalh tlang a nih hi. Silhfen-ah hian kan insengso nasa. Nei lo chung pawha foreign thil ngaisang, duhzawng a nih phawt chuan puk chawp pawha lei ngam ngat kan tam ta. Chhungkaw khawsak tihphuisui aia incheina thlang zawk, kan nalh dawn phawt chuan retheih thlang zawk te kan ni. Kutdawh suit ha leh, nula rangkachak thi awrh, tuikang nghak an sawi ang deuh kan ni. A chuang liam ni lo, a awm tawk neiin sum renchem i zir ang u.

(  Dr Lalrintluanga hi Govt. Aizawl College-a  Associate Professor a ni a. Article \ha tak min ziah sak avangin kan lawm hle mai. Ed)

Leave a Reply