Kristianna leh Zu

Kan thupui hi thupui ngaihven hlawh tak tur niin a lang a. Zirchianna nena sei tak ziak tur pawh ni ila, ziak tur a tam thei hle ang. Amaherawhchu, ziak tura min beiseituten a ziak dan turah kaihhruaina hranpa min siam sak lo a. Zalenah ka inngai a. Tu pawi kan sawi em lo ang chu.

Pathianin a rawngbawl ve tura min kohna hmun Marpara-a awm Chakma hnam te hi a tam zawk chu Buddhist sakhaw bia an ni a. Kan rawng bawlna peng khat atan Kohhran chhungkuate hianBuddhist chhungkua \awng\aipui tur bik kan insiam a. Tlaikhat chu kan chhungkuain kan \awng\aipui \hinte zinga mi chhungkaw pakhat tlawh turin ka chhuak a. Zu zuar \hin chhungkua an ni nghe nghe a. Ka tum dan chuan ka thiam ang tawkin Pathian thu ka hrilh ang a, an chhungkaw tana dil sakin Pathian hnenah \awng\aiin hun ka hmang ang tih hi a ni a. A hma lam pawhin ka tlawh tawh \hin a, \awng\aina hun pawh ka hmang \hin tho a. Tun tumah hian tlawh leh turin ka inbuatsaih a, a phur pawh ka phur hle a ni.

Amaherawhchu, kawnga ka kal lain Mizo tlangval \henkhat, Company-a thawk, tlai lam zuin tur zawngte’n min lehkhalh a, an in min thlen khalh tlat mai a. An \henawmte inah engemaw chen ka nghah hnuin an inah chuan ka lut a. Rilru pangkhing takin min dawngsawng niin ka hria. Eng thu pawh sawi ila min ngaithla tak tak dawnin ka hre lo a. Pathian thu pawh sawi lo, \awng\ai pawh \awng\ai lovin, rilru na leh lunghnur takin ka hawsan ta a. Ka Mizo puite ngei leh a ngawl an vei zu avanga rawngbawlhna min tikhawlhkham khan ka rilru a tina zual a ni.

|um khat pawh kan Pro. Pastor nen home visit kan nei a. Chakma Kristian chhungkua kan tlawh kual a. In pakhata kan awm lai chuan Mizo tlangval pahnih hi an lo lut hlawl mai a. Kan han inbiak chian chuan an zu-in tur zawng, zu awmna hre silo khan, keini pahnih kha zu zawngah min lo ngai a. Min hmuh veleh kan luhna inah an lo lut ve chu niin! Pastorte kan ni tih an han hriat chuan sawi tur an van ve khawp mai. Pakhat zawk phei chuan Kohhran Upa fapa a nih thu a la sawi zui lehnghal! Chanchintha hrilna hmunah Mizo Kristiante kan mualpho a ni ber awm e.

Hun engemawchen Kristian ni tawh, Kohhranah  pawh rawngbawltu tangkai tak ni \hin Chakma nu pakhat chuan Kristian nih a duh tawh loh thu chiang takin a sawi a. A chanchin kan han zawh chiana, a sawi dan chuan Mizo tlangval zuruite’n “Chakma tan Kristian nih ve a ngai lo” tiin, kutthlak hial khawpin an vaubet tih a sawi a. Chuvang chuan a rilru a na em em mai a, Kristian nih a tum tawh lo hial a ni. Pathian a rinnaah a chiang tawk lovin a nghet tawk lo chu a ni ngei mai a. Amaherawhchu, Mizo Kristiante hian zu avang hian Pathian pawi kan sawi ang tih a hlauhawm hle.

Hetiang thil ka han sawi duhna chhan chu zu hian chanchintha hrilna kawngah, a bikin Mizo ram chhunga hnam dangte lakah hian harsatna min siam \hin vang a ni. Heng lai vela Buddhist sakhaw bia te hian zu an in nasa hle a. An kutpuiah te phei chuan hmeichhiate pawhin an in hial a. Mahse an ngaihdan nghet tak mai chu, ‘Kristiante chuan zu an in ngai lo’ tih hi a ni. Chakma hnam, Kristian ni tawhin zu a in tih an hriat phei chuan an hmusit zui \hin hle. Mi \henkhatin Kristian nih an hreh fo na chhan pawh Kristian te chu zu nghei ngei ngei tura an ngaih avanga zu nghei an hlauh vangte pawh a ni fo \hin.

Kan thupuia ‘Kristian’ tih hi tawitein han sawi zui lawk ila, ‘Zu’ tih hrim hrim hi chu sawi zui tum lo mai ila, ‘Kristian’ tih hi thuthlungtharah vawi thum chauh sawi lan a ni a. (Tirh. 11:26; 26:28;       I Pet. 4:16) Mi \henkhat chuan he \awngkam lo chhuahna hi inhmuhsitna leh innuihzatna, tihelna lam sawina niin an sawi a. A thu (term) pawh hi Kristianten anmahni kohna tur ni lovin Kristian ni ve lote’n Kristiante hmusit taka an kohna niin an sawi bawk.

A thu lo chhuah dan chu engpawhnise, Tirhkohte hun a\anga tun thleng hian, ‘Kristian’ tih hi Lal Isua leh a zirtirna pawmtu, Amah ring a, a tana rinawm tura inpe, a hniak hnunga zuitute sawina atan hman a ni ber a. Lal Isua vang a nih chuan Kristian chuan mualpho leh hreawm, retheih thlengin a tuar ngam tur niawm tak a ni a. A chhan chu he khawvela a taksa chu boral mahse chatuan nunna a neih tawh avangin. Tirhkoh Petera pawhin, “… Kristian a nih avangin tur sela zak suh se” (I Pet. 4:16) tiin a sawi a. Hun kal tawhah inkohna hming zahpuiawm tak a ni maithei, mahse Lal Isua ringtu tan chuan hming hlu leh chhuanawm tak a lo ni ta zawk a. ‘Kristian’ tih hrim hrim hi Krista (Christo, in Greek) hmingchawia sak niin a lang bawk a ni.

Tichuan, Kristiante’n nitina kan hun hman dan, Lal Isua zirtirna, thiltih tehna dik lo thei lo nia kan pawm, kan nun innghahna Bible zirtirna kan nun chhuahpui dan chu kan ‘Kristianna’ kan Kristian dan chu a lo ni dawn ta a ni.

Kristiante chuan thil tih tehna dik lo thei lo nia kan pawm Bible hi nun kaihruaitu atan kan hmang \hin. Chutiang bawkin zu chungchangah pawh hian Bible-in min zirtir dan hi kan dah pawimawh tur a ni ngei ang. Bible-ah zu chungchang hi a lang tam hle a, a sawina \awngkam pawh chi hrang hrang a awm a. Chipchiar takin kan sawi hman lo ang a. Bible ziak hun laia mite khan Uain (zu) kha chaw, tui leh damdawi atan te an hmang thin niin a lang a (Sam. 16:20, 25:18; & I Tim. 5:23 etc) Uain tha phei chu Pathian malsawmnaah an ngai hial thin a ni (Gen. 27:28; Amos. 9:13 etc). Chuvang chuan Biblein zu a sawichhiat lohna hmun thenkhatah chuan kan hmu a ni.

Chutihrual erawh chuan zu ruih hi a dem hle a, engtiklaimahin a sawi mawi ngai lo. Zu ruih avanga an chunga chhiatna a lo thlen dan pawh Nabala chanchin (I Sam. 25:26-31) ah te, Israel lal Ela chanchin (I Lal. 16:8-10) ah te, Nova leh Lota chanchin leh hmun dangah te pawh kan hmu a. Uain ruih chu sawi loh, Uain hrim hrim a sawichhiatna pawh kan hmu nual (Thuf. 20:1; 21:17; 23:20-21, 29-33). Keini Mizoten zu kan tih ang chi phei hi chu a \ha lama hman a ni lo. Tirhkoh Paula pawh khan Uain ruih chu a khap nasa hle a, Vanrama kai lo turte zingah a telh hial a nih kha. Kohhran hruaitu ni tur phei chu a duh tui hle a, zuin ching lo an ni tur a ni (I Tim.3:3) a ti a. Kohhran rawngbawltu tur pawh zu heh leh bawlhhlawh taka help duh mi a ni tur a ni lo (I Tim. 3:8) tiin a sawi bawk a ni.

Pastor Laldinpuia Hranleh

Leave a Reply