Mizona

Ni.3. October, 2006 khan Times of India chuan Survey danglam deuh tak mai a tichhuak a, chuta a zawhna chu; ‘Piangnawn leh dawn ta la, India mi ni in i piang nawn leh duh an gem?’ tih ani a. A tam zawkin’ ‘Duh ang’ tiin an chhang a, keini mizo-te hi inzawt ve ta  ila. ‘Juda’ emaw ‘American’ –ah emaw tiin kan chhang daihin a rinawm. Amaherawhchu, kan dam chhungin, Lal Isua lo kal leh hma chu Mizo tho kan ni tawh dawn. Mizo-na  hi  changkan san chi ani lova, lehkhathiam san chi pawh ani hek lo. Ram dang a awm      bosan  chi pawh a ni lova, hming bula hnamdang hming  dah avanga hnualsuat chi lah ani hek lo. Kei zawng ka sual ani ang. Roman Catholic an nih ngawt loh chuan Sap hming invuaha an hnam hming atang chauhva Mizo tih hriat theihte hi kawm nuam ka ti lova, an inneihnaah pawh min sawmse kal ka tum lo. A thu hrimah Roman Catholic pawh nise, an hming bula Sap hming an vuah avanga Vanram luh a awlsam phah sawtna tur ka hre hek lo . Tlawmngaihna te, chingal leh saum pawh hi a mizo-na em em a awm chuang lova, Mizo-na chu rilruah a ni.

Zep nak emaw, kan mizo nula leh tlangvalte phaiah kum hnih khat an awm a, Mizo tawng an rawn pai haw lo chauh a, an zavai in an ni e kan tihna phei chu ani lo. Mizo rum rut tan phei chuan ngaihnep awm tak an ni. Mizo tawng intihthiam loh vel hi changkanna ani lovin, mawlzia leh hnam a chian lohzia lantirna ani zawk.  Mahni nihna (Identity) zahpui chi mihring hi (Psychologist- ten engtin nge an tih chiah ka hre lova) Mentally Handi-capped an ni.(metally retarded an ni bawk si lo,ka phuahchawp tawp a ni e) Eng ang pawhin hnam dang tawng chu thiam bing-bi-let mahla, an tawng I thiam avang khan engtikah mah an hnamah an ngai dawn lo che a, Mizo tho i ni ang. Mizo, mahni hnam a chiang a, Mizo nihna ngaisang thiam a piang hi hnam dang zingah pawh hmusitawmin an awm ngai lova, chhuanawm takin an awm zawk thin. Tin, Mizo tawng hi Mizo chuan a thiam ngei tur ani. Mizo tawng thiam hi Mizona erawh ani chuang lo. Mizo tawng thiam tak tak te hi Mizo an ni vek kher hek lo. Hnam chu Thisen-ah a ni zawk. Mizo tawng hman dik loh leh thiam loh hi chapopui mah zawk an awm thin a, heng ho hi chu a mawl tawk lekin an inti changkang tihna a ni. Tin, fate hming bula hnam dang hming telh leh a putuin changkang ta riau a an in ngaih chhung hi chuan Mizona rilru kan la pu tak tak lo tihna ani  ang a, ram leh hnam chu kan hmangaih tak tak ngai lovang.

Tunlai khawvel Cyber Age ah kan lut a, TV atangte, Internet atangte sap nula leh tlangval inchei dan kan hmu a, an platform dress kha an incheina tak tak emaw tiin an incheidan kan lo zir ve a, ava zahthlak em.! Hei hi chu Call Girl ani ang tih tur khawpin kan nulate an inchei a, Britney Spears inchei dan an zir a, Shakira inchei dan kan hmu leh , chute bawk. Britney Spears hi American nula ho chuan Saddam Hussein-a ai khan an haw zawk. Engvang nge? Sawi tam angai lo, BS-I awm paw-lawhzia chu kan hre vek. Chubakah, sap nula ang kha tribal kephah hlai chawn puar hian a in hmeh ve tak tak thei lo. Hetih laia kan nula te Nawhchizuar emaw tih tur khawp a incheiin, Mizona an bosal ta hi a pawi tak zet a ni. Mipate’n in kekawr hak hi kan sawisel ngawt lo va, siapsuap kha i tharthawh leh ang u, kan tihna ani hek lo. ‘Mizo takin, lai bal leh ngum khak lang lovin thawmhnaw inbel rawh u’ kan tihna a ni zawk.

Inchei dan atangin mizia a hriat theih a, chuvangin, Pastor nupui tlak ini em? tih i incheidan atangin a hriat theih. Pasalah Pastor nei rawh kan tihna ani kher lo. Inchei dan pangngai takin inchei rawh kan tihna a ni zawk. Thudang alaiin , hnam dang pasal a neih hi khap ngawt chi a ni lova, hmangaihna hian ramri nei ve hek lo le. Amaherawhchu, Sap nei leh Dumka nei an in ang reng. Sap nupui / pasal-a neih avang a chanchinbu vela fakmawi niawm fahran a comment vak vak hi hnam rilru pu pha tan chuan lai a na a ni.

Mipa bengbeh beh, mawngkawhur chhinchhiahna beh hmuh tur an tam ta. Tumahin ‘Pa’ (tunlai tawng tak in ‘Man’) an ti lo che. I rilru ruak zia i tih lanna mai ani zawk. Bengbeh I beh anih chuan mi nu leh pa in ‘Makpa’ atan an awt zawk zawk lo che. KTP active member tangkai tak chu  i ni lo phawt tih a chiang a ni.. Kekawr lah chu ek chhuak niawm fahrain kan la ha fual lehnghal a, Mizona hi kan va hnual suat ta em!! Kan fate lah chu sap School \eng hneng ve tak takah mizo tawng  pawh thiam mang lo, saptawng pawh thiam chuang lovin kan chhuah \euh a, cartoon network hmangin kan chawm seilian leh a, chumi hnuah mizotir leh kan tum a; Thing min lo ti tawh thin a ni. Kan naupangte lah  chuan Saizahawla chakzia ai chuan Undertaker-a chakzia te, Arnold-a chakzia te an hriat theih tawk a ni tawh bawk si a. Chumai a ni hleinem, Lalruanga thawnthu aiin Harry Potter thawnthu kan hre lar ta zawk hi chu Moral Assimilation dik tak a ni. Kan Mizo thawnthu leh kan nuna bet tlat Rih Dil-te hi eng thawnthu leh eng dil mahin kan thinlungah a chimral kan phal tur a ni lo. Mizo-na kan sawi laiin thenkhatin Israel mi nih \alh an lo tum ve mek bawk. Mizo-na mausam a, Juda nih tum \alh hi ka chhia leh tha hriatna hian a phal lo.

Tun hma chuan zirlaibuah te, Mizo thawnthu kha a awm thin a,  eng tizia nge maw ni zirlaibu atangin an paih tak daih ni ang? Mizo thawnthu-te hi naupangte rilrua hnam rilru puttirna tha tak a ni a, MBSE lamte hian han tharthawh leh se, a \ha khawp ang.  Mizo thawnthu-a Lalruanga thawnthu te hi sawi tawh angin; Harry Potter aia a nepna engmah a awm chuang lo. Mizo thawnthu aia hnamdang thawnthu an hriat zawk chuan,    naupangte leh thangthar zelte’n hnam rilru an mausam zel ang tih a hlauhawm ta a nih hi. Tin, Michael-a, Jimmy-a te kan fate hming ah kan sa a, Mizo beng ah erawh chuan Lianhleia, Khuangchera tih te hi a va mawi zawk em!! A tawp ber a tan chuan, I piang nawn dawn lova, ka piang nawn dawn hek lova, Mizo hle hle ang u.

Lalrinngheta

Leave a Reply