T.Hrangzika, President (VIP)

Vaphai Insuihkhawm Pawl (VIP) chuan Silver Jubilee hial a lo thleng ve ta reng mai a. He hun hlu tak min hruai thlengtu Pathian hnenah lawmthu ka sawi a, ka member pui te leh Vaphai khawchhuak hmun hrang hranga awmte leh Vaphai khaw mipui hmun thu zawng zawng te Silver Jubilee chibai ka buk a che u.

Kum 1988-2012 hun chhung hian Vaphai Insuihkhawm Pawl Office Bearer atan thahnem lo takin thawhpuite finchhuahna leh kaihhruainain ka lo thawk ve thin a. A zawna kum 25 ngawt mai O.B. a min han vuah chu insitna leh induh khawp lohna a lian duh hle mai. O.B. Ka nih ve hun chhunga thawhpuite min finchhuahna nasa tak avangin mualpho lovin ka awm a ni ber a, min hmuina leh hlahthlemna zo zaiah khan lawmthu ka sawi mawlh mawlh a, chu mai ni lova hruaitu hlun chawimawina hial dawng theia min thlangtute chungah lawmthu ka sawi tak meuh meuh a ni.

VIP in Silver Jubilee hmel a lo hmu ta hial mai leh thangthar tana rotling ni ngei tur Souvenir hlu tak mai a lo buatsaih thei thei hi lawmawm ka tiin, an thawhrimna fakawm ka ti tak zet zet a ni.

Kum 25 chhung khan kan hruaitu leh member duhawm tak tak ten chatuan ram min lo pansan tawh a, vawiinah hian an hmel hmu thei tawh lo mah ila, an thawhrimna leh VIP tana an inpekna te kha tuman kan theihnghilh phal lo ang. An inpekna avangin vawiina mite hian Silver Jubilee kan thleng thei a ni si a, an va ngaihawm tak em! Tin, kan member duhawm tak tak ten veng dang, khaw dangah awmhmun min ben bel san bawk nen kan VIP tana an inpekna te kha kan zahin kan hre reng dawn a ni.

Hruaitu hlui kal ta zawng zawngte inpekna kha ropui ka tiin ka zah tak meuh a, an inpekna leh thawhrimna avangin vawiin hi kan lo thleng ta a nih hi. Kan hruaitute thawhrimna leh inpekna te, kan Pathian venna leh kaihhruaina duhawm tak te, khawtlang tana VIP thawh hona hlu tak te chu thang leh thar tana fak tlak a nih zel theihna turin member zawng zawngte thinlung taka VIP hmakhua tha zawka a awm theihna tura inpe thar leh theuh turin ka sawm tak meuh meuh che u a ni e. Ka lawm e.