Ram Hmasawn Nan Politics (Ngaihtuahna thar kan mamawh)

Politics chungchang ka ngaihtuah apiang hian America ram President lar tak \hin J.F.Kennedy-a thu khawchang hi ka rilruah a lo lut \hin a. J.F.Kennedy chuan, “Vote neitu mi pakhat at-na vang hian mipui sawrkar (democracy) hi buainaah a lut thei”, a ti mauh mai. He thu hi kum 1960 chhova a sawi kha ni mahse India ram kilkhawr a awm Mizoram a mipui te’n politics chungchanga an rilru sukthlek dan a tarlang chiang hlein ka hria. Mizoram mipui tam tak, a bikin thalaite zingah politics hriatfiah tawk lohna avanga political party thlenga beidawng, politician-te zingah tumah ngaihsan nei bik lo, te hian beidawnna ruam a\angin danin chanvo a pek vote thlak theihna pawh hmang phur lo an awm tlat a tin a ni! Mahse, vote kan thlak loh ringawt hian ram a siam \hat dawn chuan si loh avangin engtin nge kan tih tak ang le?

Abraham Lincoln-an Mipui Sorkar (Democracy) a hrilhfiah dan hian kum zabi 21-na hun kan hman chhoh mekah pawh hian Mipuite leh Sorkar inlaichin dan tur hi a lo sawi chiang hle bawk; ‘Mipuite’n anmahni tana, anmahni ngeiin an siam sorkar’ (Government of the people, by the people and for the people) ti a a sawi hi khawthlang ram, Liberalism leh Democracy hlutna chawisangtu te leh India ram ngei pawh hian Sorkar tha leh thalo tehfung berah an hmang chho mek reng a. Sorkar chu ropui leh hausa in, khawvela ram thiltithei ber pawh ni se, mi hausa ber atanga a rethei ber te ta a nihna a bo chuan loh avangin mipuite chuan tehfung hrang hrang hmangin Sorkar chu an teh zel dawn a; chung an tehna hmang chuan anmahni leh Sorkar chungchangah ngaihdan an siam thin dawn a ni. Chuta an ngaihdan siam atang chuan Sorkar chu ‘ka sorkar‘ an ti thei emaw, theilo emaw sorkar laka rinawm tur nge? rinawm a tul lem lo tih thlengin thutlukna chu an siam mai dawn a. Heta tang hian ‘engvangin nge politics-ah mi an beidawn thin?’ tih pawh thui tak a hriat theih bawk. Political Science zirna huang chhungah hian ‘politics a beidawnna’ hi ‘political apathy’ an ti a. He tawngkam lo irhchhuahna chu mihring rilru put hmang zirna (psychology) a ni a.

Khawvel huap pawha Psychologist lar, Emile Durkheim i’n ‘mahni intihlum’ (suicide) te a zir chianna-ah chuan hetianga mahni intihlum te hian ‘midang zinga awm ve tlak lo leh khawtlang tana tangkai lo angin’ ngaihtuahna an hmang thin a ni awm e. Politics-ah pawh hian mi beidawng tam tak ‘ka vote khat ringawt hian kawngro a su lovang, ka vote te an tling leh chuang lovang, ka vote avangin ram kalphung a danglam phah lovang’ ti zawnga rilru leh ngaihtuahna seng an awm \hin a. Mahse, ‘politics chuan vote nei lo, vote thlak duh lo leh vote thlak thintu zawng zawng te pawh a huap vek si a’. Chuvangin, ngaihtuahna thar kan sen a hun e.

American pachal, Marshall chuan, “Tupawh ni la, politics-ah i tui lo a ni thei e. Mahse, politics hi nangmahah a tui tlat si”, a ti hial a ni. Political Science/Politics zirna a thu laimu ber chu Sorkar (Roreltute) leh Mipui inkar hi a ni a. Plato atanga John Rawls thleng hian Political Philosopher leh Political Scientist te’n chinfel an tum leh ngaihdan an puanchhuah reng reng hi a phenah Mipui leh Sorkar inlaichinna \ha siam an duhna hi hmuh tur a awm zel ang; chu chu rorelna dik (justice) siamna tura rahbi hmasa ber a tih theih bawk.

Plato (427-347 BC) chuan mipui 5000 awmna State (ram) a duhna chhan chu Philosopher King-in \ha taka mipui tana ro a rel theih zawkna tura a rin vang a ni a; mi nuai tam awmna State-ah chuan \ha taka rorel a har a rin vang a ni mai. Rousseau (1712-1778) chuan mihring 10,000 vel hi State population a tan a duh tawk viau thung.

Thomas Hobbes, John Locke leh Rousseau te’n Social Contract Theory an rawn vawrh chhuak a, chu Social Contract Theory laimu chu mipuite hi kan ni. Dan siamtu (Legislator), a kengkawhtu (Executive) leh a sawifiahtu (Judiciary) awm lohna huna awm mipuite chuan mumal zawka an chenho theihna turin thuneitu (Sovereign) an siam chawp chu inremna an ziah pui a, Sovereign (lal/thuneitu) tih tur ber chu mitin te nunna (life), an zalenna (liberty) leh an thil neih (property) vawn him sak a ni a; mipuite tih ve tur chu Sovereign in a tih tur te \ha taka a tih chhung chuan a thuawih tak a, a rorelna hnuaia awm a ni ve thung.

Mizo te’n lal kan neih \an dan pawh hi Social Contract ngaihdan nen pawh hian inzul tak a ni a. Zahmuaka te chhungkua kha an khaw venghim turin khaw pakhatin an sawm a, a sawmtu khaw mipuite tihtur ber chu thlawhhma nei ve hmanlo tur Zahmuaka te chhungkua hnena ‘fathang’ (chhiah) chhun kha a ni a, Zahmuaka te chhungkua chuan ral laka khaw venhim kha an tih tur a ni ve thung. Tichuan, hun a lo kal zel a, tunah chuan mipuite’n Sorkar chu kawng hrang hranga chhiah kan pek hmangin kan chawm a, sorkar pawhin mipuite hnen a\ang leh kawngdang a\anga chhiah a hmuhte \ha taka a hman chu a bat a ni ve ta a ni.

Politics hi rorelna dik tung ding tura Pathianin mihring te a pek a ni tih kan pawm em? Rorelna dik tung ding tur hian political philosopher/ Economist tam tak chuan Sorkar (State) tih loh tur chinah ramri kham mahsela J.M.Keynes (1883-1946) leh John Rawls te chuan Sorkar tih tur lam an uar thung. Industrial Revolution meichher chhitu chu State in a tihloh tur chinah ramri khamna a awm vang a ni a; mahse, chu chuan ram chhungah intluktlanlohna thuk tak a hrin chhuah tak avangin rorelna dik kalpui theih a ni lova, chuvangin kum zabi 20-na chawhma lam atang kha chuan ram chhungah rorelna dik tungding tur chuan Sorkarin tih tur tam tak a nei tih chu ngaihdan pawmawm tak a ni ta zawk a ni.

Sorkarin zirna In pakhat a din ringawt pawh hian nghawng thui tak a nei a; hnathawktu te tan hna a siam sak bakah in sakna bungrua siamtu leh zuartu te tan an thil siam hralhna turin remchang a lo awm a, lehkhathiamte tan hna a siam mai bakah nakina khawtlang leh sorkar enkawl thei turin zirlaite a chher bawk a nih hi.

Khawvel huapa mahni ramri pel rawka insumdawn tawnna a lo hluar hun (Globalization era) ah meuh pawh hian Sorkar chuan mipuite hnenah rorelna dik pe turin tan a lak sauh sauh a \ul zual hle, a chhan chu Internet khawvelah mahni tapchhak zawl a\angin khawvel kan thlir thei tawh a, chung a\ang chuan ramdang hmasawnna leh kan ram hmasawn dan kan khaikhin theih zel tawh vang a ni.

Internet khawvel hi eng Sorkar mahin a thunun hneh bik loh avangin khawvel mitah leh a khua leh tuite lakah a mualpho mai loh nan Sorkar chuan a hmalakna tur pawh fimkhur takin a ngaihtuah zawk a tul ta hial a nih hi, chu chu Democracy Sorkar tih tur dik tak pawh a ni reng a. Amaherawhchu, mipuite’n kan beisei angin sorkar chu a kal lo fova, ruling party mi leh sa an lian thur thur a, party awn lam nei lo (neutral) \an hmun a tlem tulh tulh a, ruling party member zingah contract eng i lo hmu ve thei lo an lawm lo tulh tulh bawk a. Tichuan, kan politician-te kan sawisel \an a, party sawiselna lamah a kang kai zel a, a tawpah ‘politics-ah ka beidawng‘ kan ti ta \hin a ni.

|henkhatin, ‘ aaaa..kan phu tawk chauh roreltu kan nei a lawm, mipuite hi kan la mawl em a ni’ tiin tawngkam an lo cheh ve bawk a. India parliament-ah thubuai nei lai (Criminal case) za chuang an awm hi kan phu tawk chauh a lawm i ti mai dawn em ni? Mizoram State Legislative Assembly-ah hian ziak leh chhiar thiamlo awm teuh ta se la, chungte chu chan pual (portfolio) pawimawh tak tak changin Minister nita bawk se, kan phu tawk lek a lawm i ti tho angem? Democracy ramah hian mipuite hian kan phu tawk aia chhe zawk zel roreltu kan nei a; mahse chung kan phu tawka aia \halo roreltute chu an hnathawh a zirin pawm chin leh pawm loh chin kan nei mai \hin zawk a ni. Roreltu/dan siamtu kan thlan chhuah dan hi a pawimawh khawp bawk.

India ramah chuan Dan siamtu (MP/MLA) ni tur hian Dan bawhchhiat hmasak a ngaihna chin a awm a, Danin inthlan senso atana a phalsak chin aia tam hi MP/MLA tam tak hian an campaign laiin an hman ngei ngei a tul. Chuvangin, Dan siamtu (Legislator) ni tur chuan dan bawhchhetu (Law breaker) an nih hmasak a tul tlat. Chu chu mipuite mawl vang leh retheih vang ni loin a kalphungin (Political System in ti mai ang) a kentel sa a ni a, mipuite hian duhthlan theihna hi kan nei zau lo teh a sin.

Inthlan laiin mi tam tak chuan an retheih avangin candidate te a\angin sum leh pai leh therhlo an beisei \hin, a chhan chu beisei lo theilo tur khawpa retheiin tun hma a\anga roreltu te’n rorelna dik tung ding lo a an siam vang a ni. An thlai thar hralhna tur te ngaihtuah sakin, kawngpui \ha tak siamsak bawk se, hmasawnna hnathawh reng rengin a thlenna tur hmun dik tak thleng vek thei zel ta se, rethei takin an awm reng bik dawn em ni? India ram khawpui hrang hranga mirethei chenna hmun (slum area) a chengte tan chuan nilenga vote thlak tura polling station a va intlar ai chuan Cheng za vel hlawh tura kutdawh emaw mi bawlhhlawh paih a\anga hralhchhawn leh theih tur thil an zawn kha an nitin nunna atan a pawimawh zawk. Mahse, candidate te’n Cheng za pein anmahni vote turin thlem se la, kutdawh emaw bawlhhlawh paihna hmuna tal nilen ai chuan vote thlak an thlang zawk ang. An sal tanna atanga zalenna dar vua a dinhmun tha zawka miretheite hruai chhuaktu tur chu Sorkar a ni a, mahse an phu tawk aia \halo zawk roreltu an neih miau avangin rethei takin duhthlan theihna zim tak awmna hnuaiah an kun a ni.

Heng thu te ka sawi avang hian ‘roreltu atana kan thlan tlin te hi an \ha lo vek e’ ka tihna a ni lova. Mi \ha tam tak an awm ve a; mahse, hun rei tawh tak ata kalphunga kan lo neih tawh te hi vawi lehkhata thlak thut theih a ni bik lo tih ka sawi tumna a ni zawk. Kan beisei anga sorkar a la kal thei rih lo a nih pawhin ‘beidawnna aiin beiseina’ chuan ram hmasawn nan thil tam tak a la ti thei zawk si a. Politics-ah hian political party-te hi hmanrua tam tak zinga pakhat chauh a nihna hi mi tam takin kan man loh avangin political party a lutte chauh hi emaw politics khelah kan ngai fo \hin. Hei hi kan \hanmawh bawk pakhat, politics awm zia dik tak leh a nihphung kan hriat fuhloh avanga kan hmasawn tur anga hma kan sawn theih lohna pakhat chu a ni zawk.

Kan nitin nunphung hi politics chuan min nghawng vek a; zing kan thawh hlim a\anga kan mut lai thleng hian min nghawng vek a ni. Zing kan thawh chiah hian mi tam tak chuan politics \halo rah an tuar nghal a sin. Chawhmeh man a to a, buhfai a vang a, gas lah an hmang zo tep a, gas leina tur pawisa nei mah se han lak nghal mai tur gas a awm chuang lo. Khawlaiah han kal se kawng a chhe em em mai; motor nei tan pawh chhuah zin poh leh motor a tlo lo ting a ni mai. Lir te hi han nghingin, khuahkhirhna awm miahlo hnuaia Babel insang sak zawng zawngte han chim rup hlawm mai selang, Babel insang sa ve theilo ho hi a tuar nasa ber tur kan ni ang. Heng zawng zawng hi politics rah \ha lo vanga kan tawrh mek te leh kan la tawrh theih tur te a ni a sin.

America ramah inthlanpui a awmin CNN herh nung la, candidate te campaign neih dan han thlir mai mai teh. Candidate \henkhat chuan zirna in an tlawh ngei ngei tih i hmu ang. Chung zirna in an tlawh \um te chuan zirlai naupang tak takin an kum phuloin zawhna khirhkhan pui pui, keini rama puitlingte pawhin zawhna chang an hriat loh, ram inrelbawl dan a an ngaihdan hrang hrang an zawt \hin tih i hmu ang. Chung zirlai naupang tak takte chu Republican Party emaw Democratic Party an ni kher lo; mahse, an ram politics kalphungah thuk takin an inrawlh a, a tawi zawngin ‘an ram politics-ah an tel ve‘ tihna a ni. Keini ramah chuan hei hi kan tlakchham lian tak ala ni rih. A chhan chu party a luh chiah hi politics a tel venna ni a kan hriat vang a ni.

Mi malin emaw pawl (group) in emaw sawrkar thutlukna emaw sawrkar inrelbawl danah emaw sawrkar kalphungah emaw an ngaihdan leh duh dan tilang thei tura hmalakna emaw tel vena emaw an neih hi ‘politics huang chhungah an zuang lut tihna a ni a. Hei hian inthlan huna vote thlak te, sawrkar policy duh loh avanga nawrhna hrang hrang huaihawtna a tel ve te, ram inrelbawlna khawih thil meeting a tel ve te, sawrkar kalphung/inrelbawldan sawihona a tel ve te, eng forum-ah emaw politics chungchang sawihona neih te leh politics lam rawngkai a telna hrim hrim te hi politics huang chhung a mi vek a ni.

Heng a\ang hian ngun takin ngaihtuah ila, politics khelh hi party huanga zuanluh kher a ni lo tih a hriat theih ang chu. Amaherawhchu, miin a chunga kan sawite khi duh khawp lo a, political party hmanga thuneihna neih hi effective zawka angaih avanga political party a luhchilh hi politics huang chhung a mi tho a nih avangin an duhthlanna chu zahsak a \ul ve thung a ni.

Politics chu ram hmasawnna laimu, mitin huap a ni tih kan hre ta a. Politics a \hat chuan ramin hmasawnna kawng a zawh a, politics a bawlhhlawh chuan mite’n inthiar fihlim an duh zawk tih pawh a chiang hle. Mahse, inthirfihlim tum te pawh politics a\angin an inthiarfihlim thei tak tak chuang si lova. Chuvangin, rilru leh ngaihtuahna thar seng chungin politics hi kan thlir a hun hle a ni. Politics kan thlir dan hi thlak hmasa i la, chu chuan thui takin ram hmasawnna kawng a sat kua ang. Amaherawhchu, politics thlirna dik a\anga bul \an a, tha kan thawh vena te’n ram hmasawnna a thlen tir theih chuan si loh chuan a mawhphurtu chu politician-te leh roreltu te an ni tihna a ni mai.

Lallianchhunga

Asst. Professor

Mizoram University

Leave a Reply