Tan leh Phullubuk Indo

Tlang pahnih indo thu hi tunlai hunah chuan thawnthu ang mai a ni tawh a, mahse a taka hmu leh hriate an la awm nual a. He indo dan puangtu hi Pi tialberhi a nih avangin, a chanchin thailan nual a ngai bawk a. Pi tialberhi hun laia thilthleng hmutute sawi leh upate sawi hretute hnen atanga ka dawn chhawnte ziak ka tum a ni.  – Lalbuta.

Tan tlang chu Vaphai khaw bula awm ft.6330 a sang a ni a, a chheh velah Mizote hmun hmingthang- thasiama seno neihna, thasiama nghaleng khawina, Maurawkela tui thuhruk, Fiaratui an tih leh Lungkhawsa te an awm a, tiau lui atanga thlanglam mel 5 vela awm a ni. Phullubuk vethung chu tiau chhak mel 12 vela hla, ft. 8212 a sang a ni a, Lentlang dunga awm a ni. tan tlang nena an inkar hi mel 17 (Km 25) vela ngaih a ni a, chhim thlang leh hmarchhak zawngin an in-ep a, tlang chhip mawi tak ve ve an ni.

Phullubuk tlang hnuai lawkah hian Chawnghawih khua a awm a, hmasang a Mizo hlaphuah thiam Pi Hmuaki seilenna khua a ni. Tin, Sailo thlahtu Sailova thihna khua a ni bawk. An khaw bul lawkah Ngente hmun phul zau tak leh Lalmanga nu hlawh rawihna an tih Lalmanga nu lozawl te an awm a. Chawnghawih khua atangin tan tlang chu chhim thlang zawngin thlir nuam tawk tak a ni. Chu khuaah chuan tan tlang huai lasi lalpa Lalkhama’n a zawl Pi tialberhi an tih Zatintiali a awm a. Pi tialberhi Lalkhama’n a zawl hun hi 1930 vel atanga 1960 thleng vel kha niin a rinawm.

Kan pipute khan tlang lian deuh te, puk te, sih te, Lui te, Thingkung lian leh Kham te hian huai an neiin an ring a, chung huaite chu an tihlawm loh chuan mi an tina thin niin an ring bawk a. Chung huai tlawn nan ran talhin emaw, buh leh sa kengin emaw inthawina an lo buatsaih thin a ni. Chu chu “thingbul lungbul bia” kan lo intih chhan niin a lang. Mahse, chung chu an bia ni lovin, mi an tihnat loh nana an tlawn lungawina mai a lo ni a, an biak tak zawk chu Sa pathian leh Khuanu pathian a ni tih hi upate sawi dan chu a ni. Sa leh Khua kaikawpin ‘Sakhua’ tih tawngkam a lo chhuak ta a ni an ti bawk a.

Kristian sakhuain Lushai hills, tuna Mizoram a tih en fe hnuah pawh tiau chhaka awmte chu Kristianna chuan a chiah hneh mai lo va, nu leh pa tam zawk chu hmanlai nun phungah an lung a la leng a, Pipute sakhuana, serh leh sang tam tak pawh hun rei tak chhung an la hmang chhunzawm zel a. 1965 thleng khan Khuangchawi an la awm a, Kut leh Chhawnghnawh phei chu 1974 thlenga hmang pawh an la awm.

Pi Tialberhi hi Chawnghawih khaw nu fing leh fel tak niin Hnahlan-Diltlangah pasal a nei a. A pasalin a thihsan avanga a chhung ten an hruai haw chu tiau kama an chawlh laiin nikhaw hre lovin a mu tawp mai a. A lo harh chuan, “Lungngai suh, ka rintlak i nih avangin ka thu puangtuah ka thlang che a ni, dam takin va haw la, ka lo kal leh anga, kan inkawm zel dawn nia. Ka lo zin hunah zu mi zûk la, Vawk mi talh bawk ang che, tan lalpa Lalkhama ka ni e,” tiin a rawn tawng chhuak ta a. (Zofate thu hla by LK. Liana. 1994)

Khua a thlen hnuah Lalkhama chu a va zin tak tak a, Vawk an lo talh a. Chu vawksa chu ruai atan an buatsaih a, thlangraa an theh fel hnu chuan tho rualin an rawn bawm huk a, rei teah lovah an kiang leh ta duak a, Pi tialberhi chuan, “Fatuho, rawn seng tawh rawh u le, an kham tawh a nih kha,” a rawn ti a, an seng leh ta a. Pi tialberhi inhlanna chu an lo pawmpui niin a ngaih theih. Chumi atang chuan Lalkhama nupui hian tialberhi chu puan a tahpui thin an ti mai a, ‘ni hnih lek lekah puanbu hi a zo zung zung thin a ni’ an ti.    

          tialberhi chu Chawnghawih khua Zakhuma nen an innei leh a. tum khat chu Chawnghawih khawho tlang hri chikhatin a man a, an khua a sik a, an nak a na bawk a, an damlo chuah chuah mai a. Pi tialberhi chuan dam lo chu a kan kual a, “E khai, in  khua chu in dam lo hle mai, Zachhawna leh Khuangzingi phei chu na tak an nih saw, mahse thlaphang suh u, tumah in thi lo vang,” a ti a, tumah an thi lo reng tak a.

          Chawnghawih khaw mi Hrangchhama chu a farnu, Farkawn lalnu Pi Thankimi kanin Farkawnah a zin a, a haw kawngah tan tlang hnuai a thlen chuan a kawng zawh lai chu a tawp ringawt mai a, a mangang chu a hawi a hawi ta mai a. Rei loteah kawng dang a lo inhawng leh a, a zawh thui hmain chu pawh chu a tawp leh ringawt bawk a, a hrilhai em em mai a ni. Kawng dik lovah ka kal a niang tiin kawng dang a zawng a, a lo kalna lamahte a let leh a, a hawi kual laiin lehlamah kawng a lo inhawng leh a, chu pawh chu rei a zawh hmain a tawp leh ta mai bawk a, a hlau lutuk chu ram palailengah a tlanchhe ta vak mai a ni awm e. A tawpah chuan kawng chu a hmu leh ta hlauh mai a. Chumi chungchang chu Pi tialberhi chuan, “Hrangchhama lo hawng chu ka lo fiam a, a hlau em em lehnghal a, kawng ka hawnsak leh tak vat kha,” a ti awlsam et a. Hrangchhama chu an khua a thlen thlengin a thlabar chu a la khur hlawk hlawk mai a ni an ti. Khua ami ten a thil tawn chu an lo zawt a, Pi tialberhi sawi ang chiah chu a lo ni a.

Ni khat chu Pi tialberhi fapa Tlangkhuaia’n Tuiphei luiah len a deng a, a haw kawngah Sakeiin a lo chang a, a lo ngur chhur chhur mai a. Tlangkhuaia hlau lutuk chu a tlanchhe nasa ta mai a. Chu chu Pi tilaberhi’n a lo hmu ni ngei tur a ni, “Tlangkhuaia chu ka uipain a lo chhaih a, a hlau lutuk baklengin a tlan khu, a seh awm der si lova” a ti a, awmhmun atangin a lo nuih khiah khiah mai a ni an ti.   

Pi tialberhi hi a zawl a chhuah chuan thil a hre hle mai a, sa pela ramchhuak thin ten an  rawn ta fo va, sa an kah dawn leh dawn loh a lo hrilh thin. An khuaah dam lo an awmin an dam loh chhan leh an inthawi dan tur a kawhhmuh thin avangin a chanchin chu a tlangthang ta hle a, khaw hrang hrang atangin dam lo chhung ten thumvawr turin an rawn pan thin a ni. thumvawr tura kalte hian tangka cheng khat, artui pum khat leh buhfai an keng a, zu pêngte pawh an keng bawk thin a. thum an vawr dawn hian Pi tialberhi chuan Khotein buhfai, tangka leh artui chu a keng a. Zawl kohna chhampual engemaw a neih hnuah tungchawah a dah a, khumah a muhil ta bawrh bawrh a. A rawn thangharh chuan, hla tak atanga rawn thleng ang hrimin a thaw hlawp hlawp a, a hui pup pup a, a hah hle tih a hriat theih a ni. A rawn tawng chhuak lah chu mipa hrohrang na tak ang a ni a, tiau thlang awphawi dik zet mai hian, “Ka lo thleng ta, in lo dam tlang a niang chu maw? tan lal Lalkhama ka ni e. Ka rawn kalna a hla tham a, kawng lakah ka chawl hman hlei law, ka’n thu chawl rih ange aw,” a ti a. Zu an ken chuan an khawna an zuk bawk a. Pi tialberhi chuan,  “Kan dam lo kan tur chu a na hle mai a… a tinatu chu khaw’nge ka’n zawng ang e aw,” a ti a, kawmkarte a phiat a a zawng vut vut a, “Kha… ka hmu fuh ta… chumi-khami in a sawisa a, ran chutiang chu a ngen a nih hi” a ti a. A sawi ang chuan Puithiamin a thawia an dam ve mai thin a ni.

Pi tialberhi chuan an nat chhante hetiang hian a lo hrilh bawk a, “In lo vauah sih a awm a, chu sih kama thing a kih avangin sihhuai an thinrim a nih kha, Arpa hlui sen keng u la, sih kamah chuan va inthawi rawh u,” ti tein, an nat dan a zirin inthawina hi a lo chawh thin. Natna chi hrang hrang hi an nat chhan leh an inthawi dan tur a inang lo va, a then chu buh leh sa, a then chu zu bel, a then chu ar te, vawk te te, Kel te a chawh hlawm a. A tih tur a zawh fel chuan Pi Tialberhi chu rei vak lo a muhil leh a, a rawn harh chuan nu pangngai a ni leh mai thin.

A zawl a chhuah hian Pi Tialberhi chuan “Daiah sawn ka uichal ka thlung a, naupangte kha daiah kaltir suh u, ka ui an hmuh chuan an hlau dah a nge,” a ti a, a uichal  chu Sakei a lo ni a. Chutih hun lai vel chuan daiah sakei hnu an hmu fo thin a ni. Tumkhat pawh “Ka uichalin min zui tha duh lo va, in rante kha veng tha u la, lo tang rawh u aw” a ti a. Chumi tum chuan dai hnai takah sakeiin sial a lo seh reng mai a. Pi Tialberhi chuan, “Kha asin, in rante veng tha rawh u ka ti mathlawnlo che u a,” tiin a mawhchhiat nghe nghe a.

Hetia a zawl a chhuah lai hian paho chu Pi Tialberhi titi ngaithlain an thu thup thin a, an hriat ngai loh thil tam tak a sawi thin an ti. Bochung khaw tlangval pakhat chu tibuaitu a nei a, tlanbo a tum reng mai a, chumi ven chu a hautak hle mai a. Pi Tialberhi hnenah chuan thum an vawr ta a, “Rawlkhalah Kel hnuchham an hmang a, huai a lungawi lo a ni. Kel pa hmelhem loin inthawi leh sela, chumi kel ki chuan tuisik in rawh se,” a lo ti a, a sawi ang chuan an ti a, a dam ta viah mai niin an sawi bawk. (Rawlkhal tih hi tleirawl chhuak hlim tana inthawina chikhat a ni). tumkhat chu Saihmun ramah Tumpangsial ki tha tak mai a chhuak a, an lo zim a, an kap ta a. Pi tialberhi chuan “Ka sepa vulhlai an kap vei a, an tuar ngei ang” a ti a. Rei vak lovah a kaptu chu a thi ta mai a, an ngaih a tha lo hle a ni awm e.     

Heng hun lai hian Chawnghawih leh a chheh velah thlipui na tak tak a tleh fo thin a. Khuarelin a ken tel thlipui te, to haw thlipuite nen chuan a inang lo deuh a ni mai thei. tum khat pawh thlipui na mangkheng a tleh leh a, a changin thlivir angin, a changin  hnuai lam atangin van lamah a invawrh a, bangte hi a nam sawk sawk a. A changin hmar zawngin, a changin chhim zawngin a intleh chhawk a, a ri hum hum mai a, a tihbaiawm tak zet awm e. In chhungah chuan, a thenin ban an pawm a, a then khumah puanpuiin an inkhuh a, chhungkaw pa ber intihhuai a ngâi a, lungthu tlawh chhanin naupang thlabar lutuk tur a hnem a, nu berin khur der derin thlipui chu, ‘zahngai! zahngai!’ tiin  a lo ngen hram hram a, tuthlawhte kawmchar banglaiah a thiat kual vel a. Rei fe a inhrosak hnu chuan thli chu a bang ve ta a. Thli tleh a reh ve leh a khaw mite chu pawnah an chhuak sup sup a, in chhia a awm em, inhliam an awm em tiin khawlai an fang a. Khawlaiah chuan di them leh mau phelte chu an let kawkalh nuai mai a. Pi tialberhi pawh chuan khua chu a fang ve a,  “E..kha.. thli chu a na hle mai maw, in chhia leh intuahmawh in awm em? Phullubuk nen kan indo a, tun tum chu Phullubukin min hneh tep a lawm le,” a rawn ti a. (Intuahmawh tih hi, Intina palh, tihluih ni lova inhliam sawina a ni)

Chu lo pawh chu thlipui na tak tak a tleh fo thin a, Pi tialberhi chuan in chhung atang chuan, “Tunah hian tan lam an chan a tha, tunah chuan Phullubukin an nawr let a, an inbei tawk. Tunah hian tan lamin an nawr leh ta.. saw saw saw, a nghawng a chhawk bung dawn.. a chhawk bung ta” tiin an indo dan a lo sawi thin a. A naktukah chuan Phullubuk hnuaia tlang pawng lian vak lo pakhat chu a lo min huam mai a, a lu an chhawk bun chu niin an ngai a ni. Chawnghawih khawho chuan hetia thlipui na tak tak hi vawi duai lo an tuar thin a, tan leh Phullubuk an indo an ti mai thin.

Pi tialberhi hun hnuhnung lam a ni tawh a, tumkhat chu Vutbuak khua atangin thumvawr tur an lo kal a, an fapa khawmuchawia bo ta daih mai chu an thumvawr chhan a ni. Mahse chumi tum chuan Pi tialberhi zawl a chhuak lo a, beidawngin an haw leh ta a ni awm e. A khaw mite sawi danin thumvawrtu zingah Kristiana inpe an awm chuan a zawl a chhuak thei lo an ti. (Khawmuchawi/khawimuchawi chu labotu nei, ramhuai hruaibo tihna a ni).

Tichuan Kristianna engin zual lam a pan zel a, tiau chhak lama mite pawh a khaw pumin Kohhran memberah hming an ziak hlawm a. Kohhran member ni chunga hmanlai nuna lungleng la awm hlawm bawk mahse, thui tak an kal thei tawh lo a ni. Khuangchawi avanga zu thlum ber leh Savo an chanlet tur a awm tawh lo va, se chhun leh sa aiha khawtlang hrai pawh chu a thlawna insensona mai a lo ni bawk a. Thanghlen avanga mite chunga lenna tur a awm tawh bawk hek lo.

Chanchintha Bawm zawn leh thlarau harhnain khaw hrang hrang a tuam a, hlim lamnate a tla bawk a. Pi tialberhi pawh a zawl a chhuak zen zen tawh lo a ni. An sawi danin amah zawltu Lalkhama chuan “Kristian in tam tawh a, ka lo kal tawh lovang” tiin inthen thu chu tha takin a sawi a ni awm e. Pi tialberhi pawh chu tar a lo ni tawh a, 1964 khan kum 76 mi niin a khawvel hun chu a hmang liam ve ta a ni. Tunah hian Chawnghawih khuaah Pi tialberhi(Zatintiali) damlai lung chu a la ding ve reng a ni.

            (Savo tih hi: Khuangchawi leh Sechhuna khawtlang hrai tawh ten, chutianga ti an awm ve hunah an ran talh zing atangin sa chanvo an nei thin a, chumi sawina chu a ni. Sa hi kawngkal nei takin an chan thin.

            Zu thlum ber han tih hi: Khuangchawi, Sechhun, Sa aih leh kut ni vangthlaah zu bel tam tak hi kawngro nei takin an hung thin a, inchhung lam kawngkapui hnaih berah a thlum ber an hung a, zu thlum dan indawtin kawt lamah an tlar thin. Zubel chu tlar hnihah an hung tlangpui a, a chhunglam chu lal leh upa, Khuangchawi pa, Thangchhuah pa, Se-li chhun Se-thum chhun leh pasaltha ten an chang a, pawn lam chu minaran chan a ni.

            Thanghlen hi Thangchhuah tihna  a ni.)

Leave a Reply