Kan khua Vaphai a hlat avangin,Aizawl ah hian Vaphai khaw chhuak awm te in zawmkhawmna tha, chhiatni thatni ah, abikin chhiatni ah te in lam khawm zung zung theih nan pawl din tha tihna awmin, mi thahnemngaite leh tlawmngaiten kum 1987 vel atang khan pawl din dan tur  ngaihtuahin hma an lo la chho a, Convener te insiamin Aizawl veng hrang hrangah hmalak a ni a, chu hmalakna kal zelah chuan ni 30th April,1988 ah Pu T.Thanzauva te in,  Electric Veng ah Vaphai khaw chhuak mi 230 zet inhmu khawmin pawl din ngei tha an ti a, Vaphai Insuihkhawm Pawl chu din a lo ni ta a ni.

Hemi ni hian pawl inkaihhruaina tur leh pawl kal zel dan turte sawiho nghalin, pawl hruaitute ruat leh thlang nghalin, tlaiah ruai hlimawm tak theh nghal a ni a, pawl inkaihhruaina dante siam nghalin, chung zingah chuan pawl thiltum (Aims and Objectives) paruk an siam nghal a, chungte chu:

1)      Vaphai khaw chhuak inzawmkhawmna nghet leh thawh hona tha neih.

2)      Chhiatni thatni a pheikhai rual zawka intanpui tawn.

3)      Vaphai khaw chhung thatna tura hna thawh.

4)      Harsatna bik neite tanpui.

5)      Ram leh hnam hmasawnna ngaihtuah.

6)      Chhiatni thatnia kan inlam zung zung theih nana hming leh

Address kimchang in tina neih theih tura a bu a siam tih te, heng bakah hian chhung tinin annual fee pek thin tih te a ni a, Vaphai Insuihkhawm Pawl hi a din tan atangin, vawiin thleng hian nung takin a kal reng a, hetianga a kal reng theihna hi, hruaitu hmasate inpekna leh member-te thahnemngaihna leh thawhhona that vang a ni, a lawmawm hle.

He pawl Vaphai Insuihkhawm Pawl hian a din tan atangin pawl thiltum te tihlawhtling turin phak ang tawkin tan a lain hna a thawk reng a, Aizawlah khawtlang leh ram duh loh zawnga awm  pawl member-ah an awm palh pawhin zilhna leh kawng dik  zawh tura fuihna te neih a ni thin. Hetiang a hma lak a nih lai hian kan khua (Vaphai) awmna hi Burma ram ri dep anih avangin, Vaphai nilo, thil sual ti, Vaphai khua anga inchhal, Police in an man leh chanchinthara puan te mi engemaw zat kan pawl din atang hian, Police Station leh chanchinbu, TV leh Radio lama um zui tak vawi engemaw zat kan nei tawh bawk a, eng  emaw chang chuan thu  neitu lam nena intauh deuh bat bat chang te pawh kan nei nual a ni.

Heng bakah hian  Vaphai VC, YMA leh MHIP te nen thawh ho a ni bawk a, Vaphai khawtlang thatna tur thil, han bawhzui leh hma han lak te pawh a awm nual  thin a, sawi vek sen a ni lovang. Vaphai khawchhunga kawngpui luh leh Saikhumphai tuikawng laih zawh loh vanga, Vaphai leilet a buh thar theih loh tum te pawh khan nasa takin Vaphai khawtlang hruaitu te nen pawh sawrkar leh thil tithei te nawrin, Vaphai khawtlang hruaitute hnung VIP hian a lo zui tawh bawk.

Aizawl hi kan ram khawpui ber a nih avangin, natna leh harsatna tawhin kan pan lo thei lova, Vaphai atanga damlo lo chhuk te pawh VIP hian buaipui leh sum leh paia han tanpui chang te pawh kan nei ve thin. Thihna hial khua leh tui ten an tawh a, Vaphai a ruang hawn pui tur, Motor hmanna nei  remchang mai lo, Motor hman saka ruang phurh hawn pawh enge maw zat an lo awm tawh a, mahni a Motor hmang thei pawh pawl hming hian ralna pawisa faiin kan pe thin bawk a, heng bakah hian Aizawl khawpui chhunga VIP member harsa zual te Christmas dawn hian Christmas chibai bukna thil pek mi engemaw zat hnenah kan pe tawhin, member boral te hi ralna  neih thin a ni.

Tin, Vaphai khawtlang hminga Aizawl-a YMA, Cultural club, Games and Sports lam a ni emaw  lokal te chu theih ang angin VIP hian a lo buaipui thin a, hetianga hma lakna kawng hrang hrangah hian VIP member te kan thawh hona a tha in, kan tangrual thin em em a,  a lawmawm hle a ni. Hmalakna kawng hrang hrangah hian a bik takin VIP din tan atanga vawiin thlenga min kaihruaitu leh sul min sut saka tu O.B. pawh la ni reng, Pu T.Hrangzika, tuna kan President leh Tv Vanlalkunga tuna kan Fin.Secretary te an fakawm hle a, an mahni avang hian pawl pawhin kan hmingthat phahin, chawimawi an phu hle.

Vaphai Insuihkhawm Pawl General Headquarters hian sum leh pai lak luhna kan nei tha lo hle a, kum tin annual fee kan khawn tling khawm leh mi thahnemngai ten sum an thawh tling khawm  hi a ni mai a, chu chu hria in Vaphai (Kan khawpui) VC,YMA,MHIP leh NGO hrang hrang ten, sum leh paiin min rawn pui thin a, a lawmawm thin ngei mai. Kan khawpui Vaphai khawtlang hruaitute leh mipui te nen kan thawh hona  tha tak hian, pawl a tinungin, a tih chak phah hle a ni. Hun lo kal zel turah pawh kan inpawhna leh kan thawhhona tha tak hi vawn nun zel a pawimawh hle mai.

Vaphai Insuihkhawm Pawl hian kum hnih danah Assembly / Conference kan nei thin a, Assembly neih kum hian  Address bu siam a ni bawk thin. Assembly/Conference kan neih hian a tlangpuiin mimal tlawmngaite inah kan hmang thin a chung kan neih tawhna te chu:

1)  Pu T.Thanzauvate in,  Electric Veng.                  Ni 30th April, 1988

2)  Upa C.Hualhnunate in,  Bethlehem Veng Ni 19th May, 1990

3)  Pu C. Ralsavungate in, Republic Veng                Ni 2nd May, 1992

4)  Pu C. Hranglurate in,  Republic Veng                 Ni 30th April, 1994

5)  Pu Zohrangvungate in,  Ramhlun ‘N’                  Ni 27th April, 1996

6)  Pu C.Lalthanzualate in,  Republic Veng              Ni 9th May, 1998

7)  Pu T.Sangthuamate in, Bethlehem Vengthlang Ni 6th May, 2000

8)  Pu C.Chalchhingate in, Khatla                             Ni 18th May, 2002

9)  Archive Hall, Babu tlang                                      Ni 5th June, 2004

10)    Archive Hall, Babu tlang                                   Ni 30th June, 2006

11)    Pu C. Chungliantluangate in, Chanmari                    Ni 26th July, 2008

12)    Pu V.L. Hawlate in, Chhinga Veng                            Ni 24th April, 2010.

Kum 2012 khan  Vaphai Insuihkhawm Pawl chuan Kum 25-na  Silver Jubilee ropui takin kan lo lawm a ni. Vaphai Insuihkhawm Pawl in kum sawmhnih panga kan lo thleng ta hi a lawmawm in hruaitu hmasate leh thahnemngaite hmalakna avanga tun hun thleng thei kan ni. Pathianin min hruaina zawng zawngah lawmthu kan sawi tak meuh meuh ani. Vaphai khuaa mipui te leh Aizawla mite pawh hun lo kal zel turah thawh hona tha tak nen hmalam panin i kal zel ang u.