Ralsavunga
Senior Advisor

Mihring hi kum sawmhnih panga kan tlin chuan puitling ve thawkhatah kan inngai a, kan kawng zawh tur pawh a inhril deuh uar tawh thin. Kum sawmhnihpanga thlenga awmze nei mang lova, hawihil vel mai mai tan chuan dam chhung khawsak dan turah beiseina a sang duh lo khawp mai! Kutdawh pakhat chuan a hun kal liam tawh te a thlir let a, a haw ngawih ngawih a, a hun hman mek chu a han bih chiang a, a ning ngawih ngawih a, hun lo la awm tur chu a thlir leh a, a huphurh em em a, an tih angin, hring fate hi natna te, rithut thil engnge maw te chuan, ‘A tawp e, lu mam’. Tih ang maiin, thangawk angin min nang fo thin. Upa in, vanduaina a thlenin mahriakten a thleng lova, a rual rualin thleng na ngai e’ an tih ang maia harsatna te kan chunga a lo thlen meuh chuan tanpuitu ngaiin kan vanruai thin. Heng thilah hian tumah kan bang thei lo. Keini Vaphai khaw chhuak chhungkawtin te hian kan tawng mek a, kan la tawng zel dawn tih kan hria, chung harsatna te chu engtin nge kan lo hmachhawn dawn? Engtin nge kan intanpui ang? Tih ngaihtuahin Aizawla Vaphai khawchhuak awm te chu ni 30.04.1988 khan Pu T. Thanzauva te In Electric vengah kan in ko khawm a, mi zathum vel kan kal khawm a, pawl din tha kan ti a, pawl chu kan din ta a, a hming atan ‘Vaphai Insuikhawm Pawl’ ni se kan ti.

Hemi ni hian kan hlim em em a, lawmna hlirin kan khat a ni ber mai! Kan sawi thiam mai si loh, kan la chan phak rih si loh, thil hlu tak mai inphum ru awma kan hriatna chuan min tihlimin, min luahkhat a, kan nui deuh ham ham reng mai a ni. Hemi ni hian kum hnih chhunga Vaphai Insuihkhawm Pawl hruaitu tur kan thlang nghal a, chung te chu:

President: Pu T. Hrangzika
Vice President: Tv. Vanlalkunga
Secretary: Pu Thlengliana
Treasurer: Tv Thanzuala
Fin. Secretary: Pu C. Zanghinglova
Asst. Secretary:
Pu C. Lalthanzuala, Pu H.K. Zahnuna & Pu T.Pahlira
Senior Advisers:
1. Pu Ralsavunga
2. Pu T. Thanzauva
3. Pu C. Zaduha
4. Pu Hualhnuna te an ni

He pawl thar lo piang hi a lo than duan theihna turin dan leh hraiin hung a tul a, kan hruaitu thar te hian constitution tha tak mai an rawn duang chhuak a, chung zinga a tlangpui deuh te chu:

VIP a tel duh tan member nih theih dan te.
Annual fee siam ni bawk se.
Address bu siam a, a tul dan anga kum tin siam that thin ni se.
Vaphai khaw chhuak hmun hrang hranga awm zawng zawngte tana ruahmanna dan te.
Aizawl hi Headquarter atana ruahman te.
Aizawl hi bial hrang hrangah then in, bialtu tur inruatin, chung mite chuan thawhlawm leh tul dangte thawkin bial chu an vil ang, tih te a ni a. Heng bak pawh engnge maw zat siam a ni.

Tin, baihvai taka pawl lo ding tafam chu Vaphai khawtlang hruaitu, nu leh pa te rinchhan tak meuh meuha pawl din kan ni a, he pawl ding tir hian sum engnge maw zat a mamawh thu leh khawtlang mipuite chu a chhiat a thata mawh phurtu an nih thu leh an theih ang anga tha leh zung, sum leh paia che turin, inthlahrung takin kan han hriattir a, beisei aia nasa zawk mahin minrawn hlutpui a, sum tam tham tak rawn thawh in, a tul anga hmalak an inhuam thu min rawn hrilh a, kan va han lawm tak em! Vaphai khaw mi nih hi a nuam ngawih ngawihin ka hria a, hmalak zel min tiphurin, nu leh pa nih an va han tling teh lul em! VC, YMA, MHIP leh Kohhran Hmeichhia te chungah VIP chu a lawm tak meuh a ni.

VIP chuan a theih ang angin hna a han thawk tan ta a! Khawchhuak mipuite zingah eng harsatna nge awm? Aizawla lo zin emaw Aizawl atanga Vaphai khawlam pan te zingah harsatna tawk an awm em? Tiin beng a chhi reng a. Aizawl pana damlo lo kalte chu lo thlamuanin, kan lo hmuak thin a. Damdawi ina damlo tlaivarpui ngai an awm changte pawhin damdawi ina thawk ten an hnar ngai khawpin nula leh tlangval an inpe thin a, inphut luihna awm miah lova, he tlawmngaihna kan nei hi a lawmawm hle a ni. Hetianga tlawmngaihna hi khua leh pawl tam takin an neih ve phak loh a ni.

Aizawl atanga Vaphai pan pui tur mitthi te dinhmun pawh bih chiangin, harsatna an neih ang zelin tha leh zung, sum leh paiin a tul angin a tanpui thin a; mi thenkhat bianga mittui luang chunga, ‘VIP dam reng rawh se’ ti mawlh mawlh mai han hmuh te chuan VIP hruaitute a tiphur thar hle thin. Heng zawng zawng hi kan tanrualna rah a ni. Vaphai-ho hi engtin nge in tanrual thiam bik? Tiin zawhna kan dawng fo thin.

VIP hian chhiatni thatni chauh a thliar lova, Vaphai khaw hmasawnna tur te, Vaphai khaw chhuak zingah khawtlang leh ram tana mi hnawksak an awm em? Tih te chu a hnathawh pawimawh tak a ni. Ram leh hnam tana mi hnawksak leh kawhmawh bawl an awm loh avangin a lawmawm hle a ni. Vaphai khua tihmingchhe zawnga che duh, khawchhakmi, Vaphai khua nia rawn inchhal te thlengin a ngaihven thin a, chutiang taka hmalakna chuan misual tam tak a tih tawmim phah a, harsatna tam tak kan pumpelh phah fo thin.

Hmasawnna tur kawng te pawh theih ang tawkin he pawl hian a thlir ve thin a; Vaphai khaw chhungah kawngpui a luh hma khan, a luh theihna turin khawtlang hruaitute kaiza vengin mutmawh hnarmawhah a neih a, mite mak tih khawpin khaw chhungah Motor kawngpui a kal tlang a, kan lawm tlang hle a ni. Vaphai leh a chheh vela thil hmingthang tak tak, hnam ro thil humhalh chungchangah a tul angin Vaphai khawtlang hruaitute nen tang tlang zelin theihtawp a chhuah zel thin.

Vaphai Insuihkhawm Pawl hian kum hnih dan zelah Inkhawmpui a nei thin a, hruaitu thlan tharna te, constitution siamthat te, Pawl hmalak tawhna thlirletna te kan nei thin. Kum hnih dan zel a inkhawmpui thurel leh hruaitu thar thlan thin te pawh han tarlan a chak awm hle laiin, hmun a luah lutuk dawn a, kan ti lang lo mai ang chu!

Heti taka pawimawh, Vaphai Insuihkhawm Pawl (VIP) chuan kum 25 (Silver Jubilee) hial a lo thleng ta hi a lawmawm a, mitin ten thinlung taka lawm turin kan insawm a. He pawl hi a chak lohna lai te a awm ve ngei ang; amaherawhchu, sawisel leh diriam zawnga thlir lovin, khaw chhuak member ten theihtawp chhuah a, ‘VIP tang fan fan’ ti chung zela duhsakna hlan turin kan insawm a ni e.

VIP dam reng rawh se.